«قازاقستان بارىسى» ءتۋرنيرىنىڭ جۇلدە قورى – 50 ملن تەڭگە

2 شىلدە كۇنى «بارىس ارەنا» سپورت كەشەنىندە قازاق كۇرەسىنەن جەتىنشى رەت جالپى رەسپۋبليكالىق ءتۋرنيردىڭ فينالدىق بەلدەسۋلەرى وتەدى.

ۇلتتىق كۇرەسىمىزدەن جالپىۇلتتىق جوبا بيىل دا جالعاسىن تاپتى. ءVىى «قازاقستان بارىسى» ءتۋرنيرى جىلداعىداي ءتورت كەزەڭگە ءبولىنىپ وتكىزىلىپ وتىر. اۋىلدىق، اۋداندىق جانە وبلىستىق بەلدەسۋلەرى تولىقتاي اياقتالدى. ەندى رەسپۋبليكالىق فينالى وتەدى.

فينالعا ءار ايماقتان ىرىكتەلىپ شىققان ۇزدىكتەر قاتىسادى. اتاپ ايتقاندا، 14 وبلىستىڭ، استانا جانە الماتى قالالارىنىڭ، سونداي-اق «اسكەر بارىسى» ءتۋرنيرىنىڭ جەڭىمپازدارى مەن فينالىنا شىققاندارى باق سىنايدى. بالۋاندار سانى – 34. ءارى فينالدا بەلدەسەتىن بالۋانداردىڭ ءبارى دە دوپينگ-تەكسەرىستەن وتەدى.

ايتا كەتەيىك، «قازاقستان بارىسى» قازاق كۇرەسىن دامىتۋ قورى بىلتىردان بەرى اسكەري قىزمەتكەرلەر مەن قۇقىق قورعاۋ ورگاندارى اراسىندا دا ىرىكتەۋ تۋرنيرلەرىن وتكىزىپ ءجۇر. بيىل وسى جوبانىڭ ۇزدىكتەرى دە رەسپۋبليكالىق ءتۋرنيردىڭ فينالىندا باق سىنايدى.

بيىلعى فينالدىق بەلدەسۋلەر 12 مىڭ كورەرمەن سىياتىن «بارىس ارەنا» سپورت كەشەنىندە وتەدى. بۇعان دەيىن «داۋلەت» سپورت كەشەنىندە جانە «سارىارقا» ۆەلوترەگىندە (10 مىڭعا جۋىق) ۇيىمداستىرىلىپ كەلگەن. نەگىزىنەن حوككەيشىلەرگە ارنالعان «بارىس ارەنا» سپورت كەشەنىندە بالۋاندار بەلدەسەتىن كىلەم تريبۋنالارعا جاقىن ورنالاسادى. كورەرمەندەر ءۇشىن ىڭعايلى.

«سارىارقا» ۆەلوترەگىنە ەشقانداي وكپەمىز جوق. قاي كەزدى الىپ قاراساق تا تۋرنير جوعارى دەڭگەيدە ءوتتى. ال «بارىس ارەناعا» بيىلدان باستاپ اۋىسۋىمىزدىڭ باستى سەبەبى – بۇل سپورت سارايى كۇرەس سپورتى ءۇشىن وتە ءتيىمدى. ناقتىراق ايتقاندا، جانكۇيەرلەر ءۇشىن وتە ىڭعايلى»، دەيدى قازاق كۇرەسى فەدەراتسياسىنىڭ پرەزيدەنتى، «قازاقستان بارىسى» قازاق كۇرەسىن دامىتۋ قورى قامقورشىلار كەڭەسىنىڭ توراعاسى ارمان شوراەۆ.

بيىل دا «قازاقستان بارىسى» ءتۋرنيرىنىڭ جۇلدە قورى قوماقتى بولادى (50 ميلليون تەڭگە). ماسەلەن، ءار بەلدەسۋدە جەڭىسكە جەتكەن بالۋانعا 100 مىڭ تەڭگە تابىس ەتىلەدى. ال جۇلدەلى ورىندارعا يە بولعان بالۋاندار مەن ولاردىڭ باپكەرلەرىنە بەرىلەتىن اقشالاي سىيلىقتار سوماسى تومەندەگىدەي:

ءىىى ورىن: بالۋانعا – 1 800 000 تەڭگە، باپكەرىنە – 900 000 تەڭگە
ءىى ورىن: بالۋانعا – 5 500 000 تەڭگە، باپكەرىنە – 1 800 000 تەڭگە
ءى ورىن: بالۋانعا – 25 000 000 تەڭگە، باپكەرىنە – 3 500 000 تەڭگە

سونىمەن قاتار، كورەرمەندەر اراسىندا، ياعني ساتىپ العان بيلەتتەردىڭ نومىرلەرى بويىنشا «Renault Logan» اۆتوكولىگى ويناتىلادى. بالۋاندار بەلدەسۋىنەن جاياۋ قايتپاۋ ءۇشىن «قازاقستان بارىسى» ءتۋرنيرىنىڭ فينالىنا بيلەت ساتىپ الۋىڭىز كەرەك. بيلەتتەر 500 تەڭگەدەن 5 مىڭ تەڭگەگە دەيىنگى ارالىقتا.

ەستەرىڭىزگە سالا كەتەيىك، بۇعان دەيىن بەيبىت ىستىباەۆ ءۇش رەت توپ جارىپ، ۇلان رىسقۇل، ايبەك نۇعىماروۆ جانە مۇحيت تۇرسىنوۆ جەڭىمپاز اتانعان بولاتىن.