• Қазақ
  •   
  • Qazaq
  •   
  • قازاق
  •   
  • Рус
  •   

    ەلىمىزدىڭ وليمپياداداعى العاشقى التىن مەدالى كورمەگە قويىلدى

    ەلىمىزدىڭ وليمپيادا ويىندارىندا جەڭىپ العان العاشقى التىن مەدالى وسلو قالاسىندا ءوتىپ جاتقان كورمەگە قويىلدى، دەپ حابارلادى قازاقستاننىڭ نورۆەگياداعى ەلشىلىگى.

    بۇل كورمە وسلوداعى حولمەنكوللەن تاۋ شاڭعىسى مۇراجايىندا «قازاقستان-نورۆەگيا: سپورت ديپلوماتياسى» دەگەن اتپەن قازاقستاننىڭ نورۆەگياداعى ەلشىلىگى، قازاقستان سپورت ءباسپاسوزى قاۋىمداستىعى، وسلوداعى حولمەنكوللەن تاۋ شاڭعىسى مۇراجايىنىڭ ۇيىمداستىرۋىمەن جانە وعان قازاقستان رەسپۋبليكاسى تۇڭعىش پرەزيدەنتى – ەلباسى قورى، سىرتقى ىستەر مينيسترلىگى مەن «QazSport» ۇلتتىق سپورت ارناسىنىڭ قولداۋىمەن ءوتىپ جاتىر.

    كورمە بىرنەشە كۇننەن بەرى اشىلعان. ونىڭ اشىلۋ سالتاناتىنا نورۆەگيانىڭ اتى اينالعان سپورتشىلارى – ستەن ستەنسەن پەن ۆەگارد ۋلۆانگ جانە ۆلاديمير سميرنوۆ قاتىستى. وسى جەردە نورۆەگيالىق كونكيشى ستەن ستەنسەن 1970 جىلدارى «مەدەۋ» مۇز ايدىنىندا بىرنەشە الەمدىك رەكوردتى جاڭارتقانىن، ءوزىنىڭ سپورت جولىندا مەدەۋ مەن الماتىنىڭ ورنى ەرەكشە ەكەنىن دەپ اتاپ ءوتتى. ال وليمپيادا ويىندارىندا الىس قاشىقتىقتا شاڭعى تەبۋدەن باسەكەلەس بولعان ۆەگارد ۋلۆانگ (نورۆەگيا) پەن ۆلاديمير سميرنوۆ (قازاقستان) سپورت، دوستىق جانە مادەنيەتارالىق بايلانىسقا قاتىستى پىكىر ءبىلدىردى.

    –سپورتتاعى باسەكەگە، كەي جەردە باقتالاسقا قاراماستان، ءبىزدىڭ قازاقستان سپورتشىلارىمەن دوستىعىمىز ودان ءارى نىعايا تۇسۋدە، – دەدى ۆ. ۋلۆانگ.

    ال نورۆەگيادا «سميررە» دەگەن لاقاپ اتپەن بەلگىلى وليمپيادا چەمپيونى ۆلاديمير سميرنوۆ: «مەن سپورتقا ارنالعان وسىناۋ كورمەگە قاتىسقانىما قۋانىشتىمىن. قازىرگى جاستاردىڭ كوپشىلىگى قازاقستان تۋرالى كوپ بىلە بەرمەگەندىكتەن، وسىنداي شارالار بۇل ەلمەن جانە ونىڭ مادەنيەتىمەن تانىسۋعا زور مۇمكىندىك بەرەدى»، – دەپ اتاپ ءوتتى.

    16 جەلتوقساندا ەلىمىز تاۋەلسىزدىكتىڭ 28 جىلدىعىن اتاپ وتەدى. ال ۆلاديمير سميرنوۆ – تاۋەلسىز قازاقستانننىڭ تۇڭعىش وليمپيادا چەمپيونى. سوندىقتان «سميررەنىڭ» حولمەنكوللەندە اشىلعان كورمەگە 1994 جىلى ليللەحاممەر ويىندارىندا جەڭىپ العان التىن مەدالىن اكەلۋىنىڭ ماڭىزى بار.
    ەكسپوزيتسيانى كورەرمەندەر 28 جەلتوقسانعا دەيىن ەكى اپتا بويى تاماشالاي الادى.

    قازاقستاننىڭ نورۆەگياداعى توتەنشە جانە وكىلەتتى ەلشىسى ەركىن احىنجانوۆتىڭ ايتۋىنشا، قازىرگى كەزدە ەكى ەلدىڭ اراسىندا سپورت بايلانىسى ءداستۇرلى ديپلوماتيا اياسىنان شىعىپ، ۇلكەن مانگە يە بولىپ وتىر.

    فوتوكورمەدە قازاقستان مەن نورۆەگيا سپورتشىلارىنىڭ جەتىستىكتەرى، ەكى ەلدىڭ اراسىندا حوككەي، دوپتى حوككەي، فۋتبول مەن كۇرەستەن وتكەن ماتچتاردىڭ فوتوسۋرەتتەرى، ۇسىنىلعان. سونىمەن بىرگە وندا سپورت كيىمدەرى سىيلىق رەتىندە – ساياساتكەرلەرگە، ال ۇلتتىق كيىمدەر – سپورتشىلارعا بەرىلەتىن «دجەرسي – ديپلوماتيا» جانە «شاپان –ديپلوماتيا» سەكىلدى سپورت ديپلوماتياسىنىڭ بىرنەشە ەرەكشە ۇلگىسى قويىلعان. كورمەدە حوككەي («بارىس»، «تورپەدو» جانە «سارى-ارقا»)، ۆەلوسپورت («استانا»)، جەڭىل اتلەتيكا («التاي اتلەتيكس» كلۋبى) جانە فۋتبول («قايرات» پەن «استانا») سەكىلدى سپورت تۇرلەرىنەن كاسىبي كلۋبتاردىڭ اتريبۋتيكا جيناقتاماسى دا بار.

    فوتو: قازاقپارات اگەنتتىگى.

    پىكىر جازۋ

    Your email address will not be published. Required fields are marked *

    *