SportPress.kz Qazaqstan sport jańalyqtary
Elimizdiń Olımpıada oıyndarynda jeńip alǵan alǵashqy altyn medali Oslo qalasynda ótip jatqan kórmege qoıyldy, dep habarlady Qazaqstannyń Norvegııadaǵy Elshiligi.
Bul kórme Oslodaǵy Holmenkollen taý shańǵysy murajaıynda «Qazaqstan-Norvegııa: sport dıplomatııasy» degen atpen Qazaqstannyń Norvegııadaǵy Elshiligi, Qazaqstan Sport baspasózi qaýymdastyǵy, Oslodaǵy Holmenkollen taý shańǵysy murajaıynyń uıymdastyrýymen jáne oǵan Qazaqstan Respýblıkasy Tuńǵysh Prezıdenti – Elbasy qory, Syrtqy ister mınıstrligi men «QazSport» ulttyq sport arnasynyń qoldaýymen ótip jatyr.
Kórme birneshe kúnnen beri ashylǵan. Onyń ashylý saltanatyna Norvegııanyń aty aınalǵan sportshylary – Sten Stensen pen Vegard Ýlvang jáne Vladımır Smırnov qatysty. Osy jerde norvegııalyq konkıshi Sten Stensen 1970 jyldary «Medeý» muz aıdynynda birneshe álemdik rekordty jańartqanyn, óziniń sport jolynda Medeý men Almatynyń orny erekshe ekenin dep atap ótti. Al Olımpıada oıyndarynda alys qashyqtyqta shańǵy tebýden básekeles bolǵan Vegard Ýlvang (Norvegııa) pen Vladımır Smırnov (Qazaqstan) sport, dostyq jáne mádenıetaralyq baılanysqa qatysty pikir bildirdi.
–Sporttaǵy básekege, keı jerde baqtalasqa qaramastan, bizdiń Qazaqstan sportshylarymen dostyǵymyz odan ári nyǵaıa túsýde, – dedi V. Ýlvang.
Al Norvegııada «Smırre» degen laqap atpen belgili Olımpıada chempıony Vladımır Smırnov: «Men sportqa arnalǵan osynaý kórmege qatysqanyma qýanyshtymyn. Qazirgi jastardyń kópshiligi Qazaqstan týraly kóp bile bermegendikten, osyndaı sharalar bul elmen jáne onyń mádenıetimen tanysýǵa zor múmkindik beredi», – dep atap ótti.
16 jeltoqsanda elimiz Táýelsizdiktiń 28 jyldyǵyn atap ótedi. Al Vladımır Smırnov – táýelsiz Qazaqstannnyń tuńǵysh Olımpıada chempıony. Sondyqtan «Smırreniń» Holmenkollende ashylǵan kórmege 1994 jyly Lıllehammer oıyndarynda jeńip alǵan altyn medalin ákelýiniń mańyzy bar.
Ekspozıııany kórermender 28 jeltoqsanǵa deıin eki apta boıy tamashalaı alady.
Qazaqstannyń Norvegııadaǵy Tótenshe jáne ókiletti elshisi Erkin Ahynjanovtyń aıtýynsha, qazirgi kezde eki eldiń arasynda sport baılanysy dástúrli dıplomatııa aıasynan shyǵyp, úlken mánge ıe bolyp otyr.
Fotokórmede Qazaqstan men Norvegııa sportshylarynyń jetistikteri, eki eldiń arasynda hokkeı, dopty hokkeı, fýtbol men kúresten ótken matchtardyń fotosýretteri, usynylǵan. Sonymen birge onda sport kıimderi syılyq retinde – saıasatkerlerge, al ulttyq kıimder – sportshylarǵa beriletin «djersı – dıplomatııa» jáne «shapan –dıplomatııa» sekildi sport dıplomatııasynyń birneshe erekshe úlgisi qoıylǵan. Kórmede hokkeı («Barys», «Torpedo» jáne «Sary-Arqa»), velosport («Astana»), jeńil atletıka («Altaı atletıks» klýby) jáne fýtbol («Qaırat» pen «Astana») sekildi sport túrlerinen kásibı klýbtardyń atrıbýtıka jınaqtamasy da bar.
Foto: QazAqparat agenttigi.
