قانات «جامان بالامەن» جۇدىرىقتاسادى

9 قىركۇيەكتە ەلوردانىڭ ءدال تورىندە حالىقارالىق ەحرو كورمەسى اياسىندا ايگىلى سپورتشىمىز قانات يسلامنىڭ قاتىسۋىمەن كەرەمەت كاسىپقوي بوكس كەشى وتەتىنى بەلگىلى. ءسوز ورايى كەلگەندە، بۇل شارا مادەنيەت جانە سپورت مينيسترلىگى، «سامۇرىق قازىنا» ۇلتتىق ءال-اۋقات قورى، ZHERSU وندىرىستىك-ينۆەستيتسيالىق كورپوراتسياسى، استانا قالاسى اكىمشىلىگىنىڭ مۇرىندىق بولۋىمەن ۇيىمداستىرىلىپ وتىرعانىن ايتا كەتكەن ابزال.

وسى كەشتە قاناتتىڭ كىممەن جۇدى­رىق­­تاساتىنى كەشە عانا بەلگىلى بولدى. ول – «جامان بالا» دەگەن لاقاپ اتپەن تانىمال برەندون كۋك. 1986 جىلدىڭ
13 ماۋسىمىندا كانادانىڭ ونتاريو شتاتىنا قاراستى ەيدجاكس قالاسىندا تۋىپ-وسكەن ايتۋلى بىلعارى قولعاپ شەبەرى 2011 جىلدان بەرى كاسىپقوي رينگتە كۇش سىناسىپ ءجۇر. سول ارالىقتا 18 كەزدەسۋ وتكىزىپ، سونىڭ بىردە-بىرىندە جەڭىلىستىڭ كەرمەك ءدامىن تاتقان ەمەس. ول 11 باسەكەنى نوكاۋتپەن اياقتادى. ءبىر ايتا كەتەرلىگى، وسىعان دەيىنگى جەكپە-جەكتە­رى­نىڭ بارلىعىن كۋك تەك ءوز وتانىندا ءوت­كىز­دى. مىنە، ەندى ۇيەڭكى جاپىراقتار ەلى­نىڭ وكىلى العاش رەت الىس ساپارعا شىعىپ، شەت مەملەكەتتە ونەر كورسەتۋگە تاۋەكەل ەتىپ وتىر.

برەندون كۋك سوڭعى رەت 2007 جىلدىڭ 28 قاڭتارىندا مونرەالدا جەرگىلىكتى بوكسشى ستيۆەن باتلەرمەن جۇدىرىق­تاستى. بۇل باسەكە ونتاريو شتاتى تۋما­سى­نىڭ باسىمدىعىمەن ءوتتى. 7-راۋندتا كۋك قارسىلاسىن نوكداۋنعا جىبەردى. تورەشى ونعا دەيىن ساناعانشا باتلەر ەسىن جيدى. الايدا اياعىنان نىق تۇرا الماي، تەڭسەلە بەردى. سونى دەر كەزىندە انىق بايقاعان قازى باسەكەنى توقتاتىپ، برەن­دون­نىڭ قولىن كوتەردى. تورەشىنىڭ بۇل شەشىمى كورەرمەندەردىڭ نارازى­لى­عىن تۋدىردى. ولار رينگكە ءتۇرلى زاتتار لاق­تى­را باستادى. سونىڭ ءبىرى، ياعني، مۇز­عا تولى شەلەك جەڭىمپاز اتانعان بوكسشى­نىڭ باسىنا ءتيىپ، ول ەسىنەن تانىپ قالدى. وسى شيەلەنىستىڭ اقىرى توبەلەسكە ۇلا­سىپ، ءتورت ادام ءتۇرلى دەنە جاراقاتىن الدى. ناتيجەسىندە، ەكى كورەرمەن اۋرۋ­حا­نا­عا جونەلتىلسە، تاعى ەكەۋى تەمىر تورعا قامال­دى.

قىسقاشا قايىرساق، 31 جاستاعى برەن­دون كۋكتىڭ ءجۇرىپ وتكەن جولى وسىن­داي. دەسەك تە، ونىڭ مىقتى بوكس­شى­سى ەكەنى ەش كۇمان تۋدىرماسا كەرەك. سەبەبى، وسى كۇنگە دەيىن وتكىزگەن 18 باسە­كەنىڭ بارلىعىن ول ءوز پايداسىنا شەش­تى. مۇن­داي كورسەتكىشكە قول جەتكىزۋ باقىتى ەكىنىڭ بىرىنە بۇيىرمايتىنى انىق.

قاناتتىڭ سپورتتىق تابىسى جايىندا جانكۇيەرلەر جاقسى بىلەدى. اۋەسقويلار اراسىندا وليمپيادا ويىندارى (2008 جىل، بەيجىڭ)، الەم چەمپيوناتى (2007 جىل، چيكاگو)، ازيا ويىندارى (2006 جىل، دوحا) جانە ازيا بىرىنشىلىگىنىڭ (2007 جىل، ۇلانباتىر) قولا جۇلدەگەرى اتانعان قانداسىمىز 2012 جىلدان بەرى كاسىپقوي رينگتە كۇش سىناسۋدا. سول ارالىقتا 24 رەت جەكپە-جەككە شىعىپ، بارلىعىندا جەڭىسكە جەتتى. 19 قارسى­لا­سىن ەسىنەن تاندىردى. ءوزىنىڭ سوڭعى كەزدەسۋىن ول 26 مامىردا مەكسيكالىق نوربەرتو گونسالەسپەن شىعىپ، 12 راۋند­تىق كەزدەسۋدە جەڭىمپاز اتاندى.

عالىم سۇلەيمەن