• Қазақ
  •   
  • Qazaq
  •   
  • قازاق
  •   
  • Рус
  •   

    جاقسىلىقتى جوقتاۋ اپتالىعى

    قازاقستان ءۇشىن !!!

    1983 جىل! ماسكەۋدە كسرو حالىقتارىنىڭ VIII سپارتاكياداسى ءوتتى. ول كەزدە سپورت جۋرناليستيكاسىنىڭ اتىنا تاقىم تاستاي بەكىگەن، جارىستان قالمايمىز، ءبىز دە باردىق. بۇگىنگى جاستارعا تۇسىنىكتى بولسىن، ول كەزدە كسرو-دا بۇل سپارتاكيادادان اسقان ماڭىزدى جارىس جوق بولاتىن. ول جارىستارداعى ناتيجەنى كپسس ورتالىق كوميتەتىنىڭ ءوزى باقىلاۋدا ۇستاپ، جاقسى ناتيجە كورسەتسەڭ باستان سيپاپ، ناشار ناتيجە كورسەتسەڭ قۇيرىقتان شىقپىرتاتىن! ويتكەنى، بۇل سپورتاكياداداعى جەڭىستەرىنە رەسپۋبليكا قورجىنىنا ۇپاي تۇسەتىن… تالاي باسشىلار قىزمەتتەن دە تايعان…

    كەلدىك ماسكەۋگە، جولعا جۇرەردە سپارتاكياداعا قاتىساتىن سپورتشىلار ءتىزىمىن قاراعاندا، كلاسسيكالىق بالۋاندار تىزىمىندە جاقسىلىقتىڭ دا تۇرعانىن كورگەنمىن. «ە، تىزىمگە ەنگىزە سالعان عوي، كىم بىلەدى…» دەگەم دە قويعانمىن. جارىس بولسا بىردەن ىزدەيتىنىم كۇرەس پەن بوكس! ەكەۋىندە قازاق جىگىتتەرى مول ايتەۋىر. باياعى كۇرەسكە تارتتىم بىردەن. كىلەمگە 48 كگ جاقسىلىق شىعا كەلسىن! قارسىلاسى ارميان بالۋانى. ۇستاسا كەتتى. اينالاسى ءبىر مينۋتتەي عانا بولدى،ءبىر كەزدە ارميان بالۋانىنىڭ تىزەسى جاقسىلىقتىڭ قۇلاق-شەكەسىنە ساق ەتە ءتۇستى. جاقسىلىق كىلەمگە كەسكەن تەرەكتەي قۇلادى! سۇلاپ ءتۇستى. مەن 5-6 قاتاردا وتىرعانمىن، كىلەمگە ءبىر-اق قارعىدىم. كورگەندەر بار. دارىگەر دە جۇگىرىپ شىقتى كىلەمگە. جاقسىلىق ەستەن تانىپ قالعان ەكەن; ءدارى يسكەتىپ، ۋكول سالىپ، اياق-قولىن ۋقالاپ ءجۇرىپ، 7،5 مينۋتتا ەسى ارەڭ كىردى! دەرەۋ جەدەل جاردەممەن اۋرۋحاناعا الا جونەلدى. ءبىز قالدىق زالدا. ول اۋرۋحانادا ءبىر اپتا جاتىپ شىقتى. شىققان سوڭ مەن جاتقان جەرىنە ىزدەپ باردىم. جازدىڭ كۇنى،دالادا سەرۋەندەپ ءجۇر ەكەن. …كەلگەنشە ويلاپ كەلگەنمىن; 1980-دە چەمپيون بولدى، 1981-دە چەمپيون بولدى. سودان سوڭ شىن جاتتىعۋدى تاستادى. ەل ارالادىق، كەڭەس داستۇرىمەن قايتا-قايتا «جۋدىق»، قوناقتان قوناق، كەزدەسۋدەن كەزدەسۋ… قۇشاقتاسىپ، حال سۇراسقان سوڭ دوسىما كۇلە قاراپ; «جاقا-اۋ، سەن سوڭعى ەكى جىلدا بەلسەندى جاتتىعۋدى قويدىڭ. مىنا كۇرەسكە كەلگەنىڭە جول بولسىن؟!» دەيمىن عوي. «…ەندى ، – دەيدى جاقسىلىق مەكتەپ بالاسىنداي باسى،موينىن سيپالاپ، – وتان ءۇشىن، رەسپۋبليكا ءۇشىن، قازاقستان ءۇشىن!  كۇرەس، – دەدى. قالاي بارمايمىن دەي الامىن؟!.»

    مىنە، جاقسىلىق ۇشكەمپىروۆ دەگەن پاتريوتتىڭ تاعدىرىنان ءبىر عانا ءسات! وسى جىلى جاقسىلىق ۇلكەن سپورتپەن قوشتاستى. ونى كراسنويارسك قالاسىندا وتكەن ءىرى وداقتىق جارىستا ۇلكەن سپورتتان،ياعني،كۇرەستەن، كەڭەس وداعىنىڭ قۇراما كومانداسىنان شىعارىپ سالدى…

     

    نەسىپ جۇنىسباي ۇلى،

     جۋرناليست-جازۋشى، سپورت قايراتكەرى،

    قازاقستان رەسپۋبليكاسىنىڭ ەڭبەك سىڭىرگەن قايراتكەرى.

    پىكىر جازۋ

    Your email address will not be published. Required fields are marked *

    *