ارنايى مەديتسينالىق توپتاعى دەنە شىنىقتىرۋعا جاڭاشا كوزقاراس كەرەك

مەكتەپتەگى ارنايى مەديتسينالىق توپتارداعى دەنە شىنىقتىرۋ ماسەلەلەرىن قاراستىرۋ ماقساتىندا بىلىكتى مامانداردان ارنايى جۇمىس توبى قۇرىلىپ، قازاقستان رەسپۋبليكاسى ءبىلىم جانە عىلىم مينيسترلىگىنىڭ ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى تاستانبەك قۇتجان ۇلى ەسەنتاەۆتىڭ توراعالىعىمەن بۇگىن كەزەكتى ونلاين جينالىس وتكىزىلدى، دەپ حابارلادى اتالعان ورتالىقتىڭ ءباسپاسوز قىزمەتى.

بعم ۇلتتىق عىلىمي-پراكتيكالىق دەنە تاربيەسى ورتالىعىنىڭ جانىنان قۇرىلعان جۇمىس توبى ارنايى مەديتسينالىق توپتارداعى وقۋشىلاردىڭ دەنە تاربيەسى ساباقتارىن ۇيىمداستىرۋ ەرەجەسىن ازىرلەۋدە.

«دەنە شىنىقتىرۋ جانە سپورت تۋرالى» قازاقستان رەسپۋبليكاسى زاڭىنىڭ «ءبىلىم بەرۋ ۇيىمدارىنداعى دەنە تاربيەسi مەن سپورت.  ستۋدەنتتىك جانە مەكتەپ سپورتى»  15-بابىنا سايكەس: «دەنە تاربيەسى مەملەكەتتىك جالپىعا مىندەتتى ءبىلىم بەرۋ ستاندارتتارىنا جانە ۇلگىلىك (جۇمىس) وقۋ جوسپارلارىنا سايكەس ءبىلىم بەرۋ ۇيىمدارىندا ساباق جانە ساباقتان تىس ۋاقىتتا جۇزەگە اسىرىلادى. دەنساۋلىعى ناشار ءبىلىم الۋشىلار مەن تاربيەلەنۋشىلەر ارنايى مەديتسينالىق توپتار مەن ەمدiك دەنە شىنىقتىرۋ توپتارىندا اينالىسادى.  دەنە مۇمكىندىكتەرى شەكتەۋلى ءبىلىم الۋشىلار مەن تاربيەلەنۋشىلەر بەيىمدىك دەنە شىنىقتىرۋ مەن سپورت قۇرالدارىن پايدالانا وتىرىپ اينالىسادى».

ايتا كەتەيىك، ءبىلىم جانە عىلىم مينيسترلىگىنىڭ «ۇلتتىق عىلىمي-پراكتيكالىق دەنە تاربيەسى ورتالىعى» رمقك ارنايى مەديتسينالىق توپتاعى دەنە شىنىقتىرۋ ماسەلەلەرى بويىنشا «استانا مەديتسينا ۋنيۆەرسيتەتى» كەاق جانە قاراعاندى مەديتسينالىق ۋنيۆەرسيتەتىمەن ىنتىماقتاستىق تۋرالى مەموراندۋم جاساسقان بولاتىن.