تەكتىدەن تەكتى تۋادى

بۇگىنگى سەنبى قۋانىشتى جاڭالىقتارمەن جانىمىزدى قۋانتتى. قازاقتىڭ اتى ايگىلى كوممەنتاتورى، بەلگىلى سپورت ءجۋرناليسى دياس ءىليياس ۇلى وماروۆتىڭ ءومىرجولىنا ارنالعان تاماشا ءبىر كىتاپتىڭ تۇساۋى كەسىلىپ، وقىرمانعا جول تارتىپ وتىر. «ۆەل رەپورتاج دياس وماروۆ» دەگەن اتپەن جارىق كورىپ وتىرعان ەستەلىك-ەسسەلەر جيناعى، اتاقتى كوممەنتاتوردىڭ قازاق سپورتىنداعى ەلەۋلى ەڭبەكتەرى ساعىنىشپەن ەسكە الىنادى.

مەندە ايگىلى اعامەن سپورت جۋرناليستيكاسىندا كوپ جىلدار بويى قاسىندا ءجۇرىپ، تاربيەسىن كورگەن شاكىرتتەرىنىڭ ءبىرى رەتىندە بۇل كىتاپقا ءوز ەستەلىگىمدى قالدىرعان ەدىم. ايتۋلى كىتاپتى بەلگىلى سپورت ءجۋرناليسى ءالىم اناپيانوۆ پەن تانىمال رەجيسسەر مەيىرحان اشىربەكتەر بىرىگىپ جازىپ شىعارعان ەكەن. كىتاپ تاماشا، تارتىمدى ەستەلىكتەرىمەن قۇندى.

مەنىڭ ءبىر ايتارىم، ەل ىشىندە سالاۋاتتى ءومىر سالتىن ءومىرىنىڭ سوڭعى ساتىنە دەيىن ۇستاعان ءبىر ادام بولسا، ول – دياس اعامىز. جارىقتىق، قاشان كورسەڭ اقجارقىن كۇلكىسىمەن، سيقىرلى ادەمى داۋىسىمەن ادام جانىن باۋراپ الۋشى ەدى. سوسىن مەن ول كىسىنىڭ ەشقاشان اشۋعا سالىپ، بىرەۋگە داۋىس كوتەرگەنىن ەستىگەن دە كورگەن دە ەمەسپىن. ءومىر بويى قاسىندا بىرگە ءجۇرىپ كوممەنتاتورلىق سالانى بىرگە يگەرگەن دوسى رابات جانىبەكوۆ اعامىز دا وسىنداي دوسىنىڭ اتىندا كىتاپ شىعىپ، جارىس ءوتىپ جاتقاندا ۇيدە وتىرماي، قۋانىشتى بولىسۋگە كەلىپتى.

رابات اعامىز دا دوسى تۋرالى ساعىنىشتى ەستەلىگىن اقپارات قۇرالدارىنا جاقسىلاپ شەرىن تارقاتا ايتىپ بەردى. «تەكتىدەن تەكتى تۋادى»، دەمەكشى، اكەسى ءىلياس وماروۆ كەزىندە قاز كسر-ءنىڭ مادەنيەت ءمينيسترى بولىپ تۇرعاندا كوپتەگەن قينالعان جاندارعا قامقورلىق جاساعان، جومارت جۇرەك تۇلعا بولعان ەكەن. ءازىل ايتسا دا ءدوپ ايتاتىن كەرەمەت جان بولسا كەرەك. دياس اعانى سوڭعى رەت مەن «دينامو» ستاديونىنان شىعىپ كەلە جاتقاندا كورگەن ەدىم. سوندا اعامىز جاسى سەكسەنگە جەتسە دە ءالى دوپ تەۋىپ، سالاۋاتتى ءومىر سالتىن دارىپتەپ ءجۇردى.

جارىقتىق، ەرەكشە تۋعان جان ەدى. جۇمساق، جاراسىمدى ازىلدەرى دە تەك وزىنە عانا جاراسىپ تۇراتىن. اللانىڭ راحىمىنا بولەنىپ الدى پەيىش، ارتى كەنىش بولسىن دەگەن تىلەۋدى ايتامىز. مىنە، بۇگىنگى جارىق كورىپ وتىرعان كىتابىنىڭ تۇساۋكەسەرىنە وراي، فۋتبولدان «قايرات» كلۋبىنىڭ ارداگەرلەرى مەن جۋرناليستەردەن جاساقتالعان قۇراما كوماندا ويىن الاڭىندا كەزدەستى. كەزدەسۋ 2:2 ەسەبىمەن تەڭ اياقتالدى. مۇندايدا دوستىق جەڭدى دەپ جاتادى ەمەس پە. «قايرات» قۇراماسىندا كەزىندە جاسىل الاڭدا تەڭدەسىز ونەرىمەن جانكۇيەرلەرىن ءتانتى ەتكەن ۆاحيد ماسۋدوۆ ونەر كورسەتتى. «سىرلى اياقتىڭ سىرى كەتسە دە سىنى كەتپەپتى»، دەمەكشى، ۆاحا ءالى سول بابىندا سياقتى. ويىن سوڭىنان جيىلىپ ەستەلىك سۋرەتكە ءتۇسۋدىڭ ءساتى كەلدى.

اقىن ورداباي ۇلى،

 الماتى