ريم قالاسىندا قىسقى وليمپيا ويىندارىنىڭ الاۋى جاعىلدى

ريمدەگى پياتستسا دەل كۆيرينالە الاڭىندا ميلان-كورتينا-2026 قىسقى وليمپيا ويىندارىنىڭ الاۋىن جاعۋ سالتاناتتى ءراسىمى ءوتتى، دەپ حابارلادى ۇلتتىق وليمپيالىق كوميتەت.

الاۋ الدىڭعى كۇنى گرەكيادان جەتكىزىلدى. وليمپيادا الاۋىن يتاليا پرەزيدەنتى سەردجو ماتتارەللا رەسمي تۇردە تۇتاتتى.

ءىس-شاراعا حالىقارالىق وليمپيالىق كوميتەتىنىڭ پرەزيدەنتى كيرستي كوۆەنتري، وليمپيا ويىندارىن ۇيىمداستىرۋ كوميتەتىنىڭ باسشىسى دجوۆانني مالاگو مەن يتاليانىڭ ۇلتتىق وليمپيالىق كوميتەتىنىڭ جەتەكشىلەرى قاتىستى.

كيرستي كوۆەنتري قۇتتىقتاۋ سوزىندە وليمپيادا الاۋىنىڭ ۇرپاقتار ساباقتاستىعىن بايلانىستىراتىن جانە وليمپيالىق قوزعالىستىڭ باستاپقى ءمانى — شابىتتاندىرۋدى، بىرىكتىرۋدى جانە ءار سپورتشىنىڭ ەشقانداي كەمسىتۋسىز جارىسقا قاتىسۋ قۇقىعىن قورعاۋدى ەسكە سالاتىن سيمۆولدىق كۇشى بار ەكەنىن اتاپ ءوتتى.

سونداي-اق ول يتاليادا وتەتىن ويىندار ءوزىنىڭ پرەزيدەنت رەتىندەگى العاشقى قىسقى وليمپياداسى بولاتىنىن ايتىپ، بۇل ويىندار سپورتشىلار ءۇشىن دە، بۇكىل الەم ءۇشىن دە جارقىن وقيعاعا اينالاتىنىنا سەنىم ءبىلدىردى.

ال يتاليا پرەزيدەنتى سەردجو ماتتارەللا وليمپيادا الاۋىنىڭ بەيبىتشىلىك، بىرلىك جانە ءوزارا قۇرمەت بەلگىسى ەكەنىن ەرەكشە اتاپ ءوتتى، — دەلىنگەن حابارلامادا.

وسىدان كەيىن دجوۆانني مالاگو پرەزيدەنتكە الاۋدى تاپسىردى. ال يتاليا پرەزيدەنتى الاڭدا ورناتىلعان وليمپيادالىق شامدى جاقتى.

الاۋ ريمگە جەتكىزىلگەننەن كەيىن ەستافەتانىڭ العاشقى مەترلەرىن دجوۆانني مالاگو مەن تەننيسشى جاسمين پاوليني ءجۇرىپ ءوتتى.

يتاليا اۋماعىنداعى وليمپيادا الاۋىنىڭ رەسمي ەستافەتاسى 6 جەلتوقساندا باستالادى. مارشرۋت ەلدىڭ ماڭىزدى مادەني جانە تاريحي ايماقتارىن، سونىڭ ىشىندە كوپتەگەن يۋنەسكو نىسانىن قامتيدى.

ميلان-كورتينا-2026 قىسقى وليمپيادا ويىندارى 6-22 اقپان ارالىعىندا بولادى.