Rım qalasynda qysqy Olımpııa oıyndarynyń alaýy jaǵyldy

Rımdegi Pıaa del Kvırınale alańynda Mılan-Kortına-2026 qysqy Olımpııa oıyndarynyń alaýyn jaǵý saltanatty rásimi ótti, dep habarlady Ulttyq Olımpııalyq komıtet.

Alaý aldyńǵy kúni Grekııadan jetkizildi. Olımpıada alaýyn Italııa prezıdenti Serdjo Mattarella resmı túrde tutatty.

Is-sharaǵa Halyqaralyq Olımpııalyq komıtetiniń prezıdenti Kırstı Koventrı, Olımpııa oıyndaryn uıymdastyrý komıtetiniń basshysy Djovannı Malago men Italııanyń Ulttyq Olımpııalyq komıtetiniń jetekshileri qatysty.

Kırstı Koventrı quttyqtaý sózinde Olımpıada alaýynyń urpaqtar sabaqtastyǵyn baılanystyratyn jáne olımpııalyq qozǵalystyń bastapqy máni — shabyttandyrýdy, biriktirýdi jáne ár sportshynyń eshqandaı kemsitýsiz jarysqa qatysý quqyǵyn qorǵaýdy eske salatyn sımvoldyq kúshi bar ekenin atap ótti.

Sondaı-aq ol Italııada ótetin oıyndar óziniń prezıdent retindegi alǵashqy qysqy Olımpıadasy bolatynyn aıtyp, bul oıyndar sportshylar úshin de, búkil álem úshin de jarqyn oqıǵaǵa aınalatynyna senim bildirdi.

Al Italııa prezıdenti Serdjo Mattarella Olımpıada alaýynyń beıbitshilik, birlik jáne ózara qurmet belgisi ekenin erekshe atap ótti, — delingen habarlamada.

Osydan keıin Djovannı Malago prezıdentke alaýdy tapsyrdy. Al Italııa prezıdenti alańda ornatylǵan Olımpıadalyq shamdy jaqty.

Alaý Rımge jetkizilgennen keıin estafetanyń alǵashqy metrlerin Djovannı Malago men tennısshi Jasmın Paolını júrip ótti.

Italııa aýmaǵyndaǵy Olımpıada alaýynyń resmı estafetasy 6 jeltoqsanda bastalady. Marshrýt eldiń mańyzdy mádenı jáne tarıhı aımaqtaryn, sonyń ishinde kóptegen IýNESKO nysanyn qamtıdy.

Mılan-Kortına-2026 qysqy Olımpıada oıyndary 6-22 aqpan aralyǵynda bolady.