«Almaty týry – 2017» kóshege kedergi keltirmeıdi – Darhan Qaletaev

30 qyrkúıek kúni Almaty qalasynda dástúrli halyqaralyq «Almaty týry – 2017» kópkúndik velojarysy bastalady. Osyǵan oraı Qazaqstan velosport federaııasynyń prezıdenti Darhan Qaletaev jarysqa engizilgen ózgerister týraly aıtyp berdi.

Bıyl aıtýly jarys qarqyn alyp, kópkúndik pishinde ótetin boldy.

«Bıyl biz UCI uıymy jobamyzdyń dárejesin arttyrý týraly suranysymyzǵa ruqsat berdi. Osynyń arqasynda «Almaty týry» alǵash ret eki kezeńge bólinip ótkiziledi. Kópkúndikti uıymdastyrýdyń deńgeıi árıne múldem basqa. Uıymdastyrý sharttarynda da aıyrmashylyq bar. Osyǵan deıin ótken tórt nusqasynan áldeqaıda bólek. Birinshiden – bul jańa marshrýt. Birinshi kúni shabandozdar qala kóshelerimen júrip ótedi. Bul jerde aınalma jol 27 shaqyrym bolady. Al ekinshi kezeńde, ıaǵnı 1 qazan kúni sportshylar taýǵa qaraı shyǵýy kerek. Bıyl biz azdaǵan ózgerister engizip, ońtústik astanamyzdyń taýly aımaqtaryn da qoldanýdy jón kórdik. Velojarystyń máre syzyǵy Almatynyń eń kórikti jerleriniń biri Medeýde ornalasqan. «Almaty týry – 2017» jarysynyń kelesi mańyzdy sáti – qala ómiriniń jaǵdaıyna yńǵaılaný. Siz bul jerde start alatyn oryndardan birinshi kúni-aq baıqaı alasyz. Ekinshi kezeńde bul oryndar arnaıy ǵımarattardyń mańynda ornalasqan. Kóshelerdi jabýǵa baılanysty aıtar bolsam, bıyl bul máseleni jan-jaqty talqylaı kele mynandaı sheshim qabyldadyq. Veloshabandozdar ótip ketkennen keıin sol mańaıdaǵy kósheler qaıtadan ashylatyn bolady. Almaty – turǵyndary kóp, úlken qala. Sáıkesinshe, jol keptelisteriniń de bolýy zańdylyq. Biz jarysqa qatysýshylarǵa qanshalyqty jaǵdaı jasasaq, qala turǵyndarynyń da jaǵdaıyn qaperde ustaýymyz kerek», dedi Qazaqstan velosport federaııasynyń prezıdenti Darhan Qaletaev.

Onyń aıtýynsha, dástúrli velojarysqa Qazaqstan atynan «Astana Pro Team» komandasy qatysady.

«Komanda quramynda qazaqstandyq úzdik shabandozdardyń biri Alekseı Lýenko men Rıo Olımpıadasynyń kúmis júldegeri Iakob Fýlsang bar. Olar bıylǵy maýsymda laıyqty deńgeıde óner kórsetti. Almatyda ótetin jarysqa álemniń 17 elinen 20 komanda qatysady. Bıyl qatysýshylar sanyn arttyrǵanymyzdy aıta keteıin. Ár komandanyń quramynda joǵary deńgeıli shabandozdar bar», dedi Darhan Qaletaev.

Aıta keteıik, «Almaty týry» kásipqoı velojarysy 2013 jyldan beri uıymdastyrylyp keledi. Bıylǵy mereıli besinshi týry alǵash ret eki kúnnen, ıaǵnı 30 qyrkúıek pen 1 qazanda ótpek. 29 qyrkúıekte Respýblıka saraıynyń alańynda qatysýshy komandalardyń tanystyrý rásimi ótedi.

Velojarys jankúıerleri úshin túrli konkýrstar men utys oıyndary, áýesqoı jarystar qarastyrylǵan. Munyń bári 28 qyrkúıekke josparlanyp otyr.