SportPress.kz قازاقستان سپورت جاڭالىقتارى
30 قىركۇيەك كۇنى الماتى قالاسىندا ءداستۇرلى حالىقارالىق «الماتى تۋرى – 2017» كوپكۇندىك ۆەلوجارىسى باستالادى. وسىعان وراي قازاقستان ۆەلوسپورت فەدەراتسياسىنىڭ پرەزيدەنتى دارحان قالەتاەۆ جارىسقا ەنگىزىلگەن وزگەرىستەر تۋرالى ايتىپ بەردى.
بيىل ايتۋلى جارىس قارقىن الىپ، كوپكۇندىك پىشىندە وتەتىن بولدى.
«بيىل ءبىز UCI ۇيىمى جوبامىزدىڭ دارەجەسىن ارتتىرۋ تۋرالى سۇرانىسىمىزعا رۇقسات بەردى. وسىنىڭ ارقاسىندا «الماتى تۋرى» العاش رەت ەكى كەزەڭگە ءبولىنىپ وتكىزىلەدى. كوپكۇندىكتى ۇيىمداستىرۋدىڭ دەڭگەيى ارينە مۇلدەم باسقا. ۇيىمداستىرۋ شارتتارىندا دا ايىرماشىلىق بار. وسىعان دەيىن وتكەن ءتورت نۇسقاسىنان الدەقايدا بولەك. بىرىنشىدەن – بۇل جاڭا مارشرۋت. ءبىرىنشى كۇنى شاباندوزدار قالا كوشەلەرىمەن ءجۇرىپ وتەدى. بۇل جەردە اينالما جول 27 شاقىرىم بولادى. ال ەكىنشى كەزەڭدە، ياعني 1 قازان كۇنى سپورتشىلار تاۋعا قاراي شىعۋى كەرەك. بيىل ءبىز ازداعان وزگەرىستەر ەنگىزىپ، وڭتۇستىك استانامىزدىڭ تاۋلى ايماقتارىن دا قولدانۋدى ءجون كوردىك. ۆەلوجارىستىڭ مارە سىزىعى الماتىنىڭ ەڭ كورىكتى جەرلەرىنىڭ ءبىرى مەدەۋدە ورنالاسقان. «الماتى تۋرى – 2017» جارىسىنىڭ كەلەسى ماڭىزدى ءساتى – قالا ءومىرىنىڭ جاعدايىنا ىڭعايلانۋ. ءسىز بۇل جەردە ستارت الاتىن ورىنداردان ءبىرىنشى كۇنى-اق بايقاي الاسىز. ەكىنشى كەزەڭدە بۇل ورىندار ارنايى عيماراتتاردىڭ ماڭىندا ورنالاسقان. كوشەلەردى جابۋعا بايلانىستى ايتار بولسام، بيىل بۇل ماسەلەنى جان-جاقتى تالقىلاي كەلە مىنانداي شەشىم قابىلدادىق. ۆەلوشاباندوزدار ءوتىپ كەتكەننەن كەيىن سول ماڭايداعى كوشەلەر قايتادان اشىلاتىن بولادى. الماتى – تۇرعىندارى كوپ، ۇلكەن قالا. سايكەسىنشە، جول كەپتەلىستەرىنىڭ دە بولۋى زاڭدىلىق. ءبىز جارىسقا قاتىسۋشىلارعا قانشالىقتى جاعداي جاساساق، قالا تۇرعىندارىنىڭ دا جاعدايىن قاپەردە ۇستاۋىمىز كەرەك»، دەدى قازاقستان ۆەلوسپورت فەدەراتسياسىنىڭ پرەزيدەنتى دارحان قالەتاەۆ.
ونىڭ ايتۋىنشا، ءداستۇرلى ۆەلوجارىسقا قازاقستان اتىنان «Astana Pro Team» كومانداسى قاتىسادى.
«كوماندا قۇرامىندا قازاقستاندىق ۇزدىك شاباندوزداردىڭ ءبىرى الەكسەي لۋتسەنكو مەن ريو وليمپياداسىنىڭ كۇمىس جۇلدەگەرى ياكوب فۋلسانگ بار. ولار بيىلعى ماۋسىمدا لايىقتى دەڭگەيدە ونەر كورسەتتى. الماتىدا وتەتىن جارىسقا الەمنىڭ 17 ەلىنەن 20 كوماندا قاتىسادى. بيىل قاتىسۋشىلار سانىن ارتتىرعانىمىزدى ايتا كەتەيىن. ءار كوماندانىڭ قۇرامىندا جوعارى دەڭگەيلى شاباندوزدار بار»، دەدى دارحان قالەتاەۆ.
ايتا كەتەيىك، «الماتى تۋرى» كاسىپقوي ۆەلوجارىسى 2013 جىلدان بەرى ۇيىمداستىرىلىپ كەلەدى. بيىلعى مەرەيلى بەسىنشى تۋرى العاش رەت ەكى كۇننەن، ياعني 30 قىركۇيەك پەن 1 قازاندا وتپەك. 29 قىركۇيەكتە رەسپۋبليكا سارايىنىڭ الاڭىندا قاتىسۋشى كوماندالاردىڭ تانىستىرۋ ءراسىمى وتەدى.
ۆەلوجارىس جانكۇيەرلەرى ءۇشىن ءتۇرلى كونكۋرستار مەن ۇتىس ويىندارى، اۋەسقوي جارىستار قاراستىرىلعان. مۇنىڭ ءبارى 28 قىركۇيەككە جوسپارلانىپ وتىر.
