Sportqa bólingen qarjy tekserilýi kerek – Dáýlet Turlyhanov

Búgin Almatyda qazaqtyń áıgili balýany, grek-rım, erkin jáne áıelder kúresi federaııasynyń prezıdenti, Azııa kúres federaııasynyń prezıdenti, UWW bıýrosynyń múshesi Dáýlet Turlyhanov jýrnalıstermen kezdesip,el sportyndaǵy ózekti máseleler jaıynda pikirin bildirdi.

Baspasóz máslıhaty bastala salyp, Dáýlet Bolatuly qazirgi kúndegi eldegi jasóspirimder, jastar jáne eresekter arasyndaǵy grek-rım, erkin jáne áıelder kúresindegi jasalyp jatqan irgeli jumystar men jetistikterdi tarqata aıtyp, tobyqtan tartyp turǵan túıindi máselerge de toqtalyp ótti.

«Meni qazirgi kezdegi el sportyndaǵy kóptegen ózekti máseleler tolǵandyrady. Aıtalyq, sport pen mádenıettiń qosaqtalyp jumys istep jatqany durys emes. О́ıtkeni, mádenıettiń ózine qatysty máseleleri jetip jatyr. Sol sekildi sporttyń da óz aldyna ózekti problemalary bar. Sondyqtan ekeýi de bólek sharýashylyq bolǵandyqtan bólinýi kerek. Sonymen qatar, Mádenıet jáne sport mınıstri Dáýren Abaevqa aıtarym, úlken sportqa aımaqtarda bólinetin qarjy máselesine qaıta nazar aýdarsa deımin. Búgingi kúni oqý-jattyǵý jumystaryn ótkizý barysynda kóptegen kedergiler týyndap jatady. Mysaly, kúres túrlerinde ǵana emes barlyq sportta básekeles qarsylastarsyz sportshy óspeıtinin týraly basa aıtqym keledi. Biz búgin jattyqtyrýshylarymyzdy «qaıyrshynyń» kúıine ákelip jetkizip otyrmyz. Elimizde sportshylardyń jarystarǵa daıyndalýyna tıisti jaǵdaı jasalmaǵan. Sondyqtan da sport salasy úlken qıynshylyqtarǵa tap kelip otyr. Aıtalyq, bapkerler baryp basshylyqtan, komıtet pen Olımpıadalyq daıarlaý ortalyǵynyń esigin ashyp, oqý-jattyǵý jıynyn ótkizý týraly qarajat qajet ekenin surasa, aqsha joq degen jaýap alady. Mysaly, grek-rım balýandary Islam oıyndaryna baryp, Qazaqstan 10 salmaqtyń tórteýine ǵana qatysty. Al, qalǵan salmaq dárejelerine qarjy bólinbegen. Sonda muny qalaı túsinýge bolady?! Men osy oraıda premer-mınıstrdiń birinshi orynbasary Eraly Luqpanuly Toǵjanovqa elimizdegi buqaralyq sportqa, joǵary jetistikter sportyna bólingen qarjyǵa tekserý júrgizý týraly úndeý joldaǵym keledi», — dep dańqty balýan  óz oıyn ashyq bildirdi.

Dáýlet Bolatuly sonymen qatar, jaǵa-jaı kúresin (plıajnaıa borba, — red.) damytý búgingi kezde kún tártibinen mańyzdy oryn alyp otyrǵanyn aıtty. Qazirgi tańda álemde osy kúres túrine shyndap kirisip jatqanyn aıta kelip, zaman aǵymynan kesh qalmaı elimizde de osy jaǵa-jaı kúresin damytýdy qolǵa alý kerektigin alǵa tartty. Sonymen birge, Dáýlet Bolatuly aldaǵy aıda Serbıanyń  Belgrad qalasynda kúres túrlerinen ótetin álem chempıonatyna qatysatyn ulttyq quramanyń  balýandary týraly da biraz aqpar berip ótti. Negizi el sportyndaǵy ózekti máselelerdi kótergen dańqty balýannyń árbir aıtqan sózine qosylýǵa týra keledi. Rasymende óńirlerdegi sportqa bólinetin memleket qarjysy tistegenniń aýzynda, ustaǵannyń qolynda ketpeýi kerek. Qajetti qarjy kózi az bólinip, jeter jerine jetpeı jatqandyqtan sport qana emes árbir salada másele týyndap jatqanyn kórip jatyrmyz. Sondyqtan da Dáýlet Bolatulynyń joǵary bılikke júrekjarda úndeýi óte der kezinde bolyp otyr dep topshylaýǵa bolady. О́ıtkeni, bar ómirin kúreske arnap, sporttyń taıqazanynda bite qaınasyp ósken áıgili balýannyń kótergen máselesi óte ózekti ári mańyzdy. Sol sebepten halyqtyń  kókeıinde kópten beri júrgen bul máselege atústi qaraýǵa bolmaıdy. Endeshe, bul úndeýge bılik durys kózqaraspen jaýap berer degen senimdemiz.

Aqyn ORDABAIULY,

ALMATY