SportPress.kz Qazaqstan sport jańalyqtary
– Ulttyq quramanyń aldaǵy oıyndarǵa daıyndyq deńgeıi týraly aıtyp berińizshi. Birneshe oıynshy qatysa almaıtyny týraly belgili boldy.
– Iá, ol ras. Aldaǵy oıyndarǵa qatysa almaıtyn oıynshylarymyz bar. «Astanadan» Mýjıkov, Shomko, Mokın kómektese almaıdy. Bizge jigitterdiń densaýlyǵy mańyzdyraq. Sondyqtan óz klýbtarynda emdeletin bolady. Olardyń tezirek jazylyp ketýin tileımiz.
– Al Sergeı Malyıdy amaldyń joqtyǵynan shaqyrdyńyz ba? Qansha degenmen, onyń oıyn praktıkasy ózgelerine qaraǵanda azdaý.
– Amaldyń joqtyǵynan dep aıtýǵa bolmas. Ol ulttyq quramaǵa osyǵan deıin birneshe ret shaqyrtý alǵan, tájirıbesi de joq emes. Ras, qosalqy quramda birneshe fýtbolshymyz bolǵan. Biraq ókinishke qaraı olar da jaraqat alyp qaldy. Sondaı-aq, ortalyq qorǵanysta sary qaǵaz ıelengen oıynshylarymyz bar. Sondyqtan osynyń bárin jan-jaqty eskerdik. Budan bólek, Georgıı Jýkovtyń, Baýyrjan Islamhannyń qatysa almaıtyny bizge qıyndaý bolyp tur. Degenmen bul fýtbol ekenin umytpaıyq. Munda bári bolady. Negizgi quramdaǵy oıynshylardyń ornyn ózge de jigitter laıyqty túrde basa alady. Ulttyq qurama jekelegen oıynshylardan emes komandadan turady.
– Irikteý kezeńi aıaqtalyp qaldy. Sizge osy kezeńde komandany jasartý isinen bólek ózge tapsyrma berilip pe edi?
– Eń bastysy jastarǵa kóbirek múmkindik berý bolatyn. Jastar týraly osyǵan deıin birneshe ret aıtqanmyn. Jastar quramasynda bolashaǵynan úlken úmit kúttiretin oıynshylar az emes. Olardy ózimizge shaqyrar edik. Biraq Bolgarııaǵa qarsy oıyn kútip tur. Ol jaqta joǵary oryndardyń birin ıelený múmkindigi bar. Qazir bes-alty jigitti nazarymyzda ustap otyrmyz. Olar bolashaqta el fýtbolyn órge súıreıtin oıynshylardyń biri bolady dep úmittenemin.
– Sizdiń eńbegińizdi Qazaqstan fýtbol federaııasy qandaı ólshemdermen baǵalaıdy?
– Ol jaǵyn bilmedim. Biraq qazirgi jumysyma ózimniń kóńilim tolmaıtynyn aıta ketkim keledi. Tilshiler qaýymynan buryn ózimdi ózim kóbirek synǵa alamyn. Al Qazaq fýtbolynyń bolashaǵy zor. Munda nebir talantty jastar ósip keledi.
