چەمپيوندار ليگاسى: «قايرات» پەن «ايات» كۇتپەگەن ويىن كورسەتتى

الماتىنىڭ فۋتزالدان «قايرات» كلۋبى چەمپيوندار ليگاسىندا ەكىنشى كەزدەسۋىن وتكىزىپ، تاعى دا جەڭىسكە جەتە المادى. بۇل جولى الماتىلىقتار يسپانيانىڭ پالما-دە-مالوركا قالاسىنىڭ «پالما» كومانداسىمەن ويناپ، 2:2 ەسەبىمەن تەڭ ءتۇستى.

ماتچتىڭ 9 مينۋتىندا دۋگلاس جۋنيور وز قاقپاسىنا دوپ سوقتى. سودان كەيىن اراعا 10 مينۋت سالىپ داۋرەن تۇساعۇلوۆ ەسەپتى تەڭەستىردى. كەزدەسۋدىڭ 36-مينۋتىندا شىڭعىس ەسەنامانوۆ گول سالىپ، «قايراتتى» العا شىعاردى. الايدا نەگىزگى ۋاقىتتىڭ بىتۋىنە 1 مينۋت قالعاندا «پالمانىڭ» ويىنشىسى ەلوي روحاس ەسەپتى تەڭەستىرىپ كەتتى. وسىنىڭ الدىندا «قايرات» بەلگيانىڭ «حاللە-گوويك» كومانداسىمەن دە 2:2 ەسەبىمەن تەڭ ويناعان ەدى.

ەندى «قايرات» 1-توپتاعى كەلەسى كەزدەسۋىن 29 قازاندا فرانتسيانىڭ «سپورتينگىنە» قارسى وتكىزەدى.

ال رۋدنىيدىڭ «ايات» كلۋبى چەمپيوندار ليگاسىنىڭ توپتىق كەزەڭىنىڭ ەكىنشى ويىنىندا ۇتىلدى. ولار پورتۋگاليانىڭ «سپورتينگ» كومانداسىنان ۇلكەن ەسەپپەن جەڭىلدى. ەسەپ –  1:7. «سپورتينگتىڭ» ساپىندا ديەگو كاۆيناتو (4 مينۋت)، پاۋلەتا (5، 7 مينۋت)، ەريك (16 مينۋت)، ۋگۋ سيلۆا (20، 34 مينۋت) مەن ميگەل انجەلۋ (38 مينۋت) گولداردىڭ اۆتورى اتاندى.

«ايات» كلۋبىندا جالعىز دوپتى ۇلتتىق قۇراما ويىنشىسى ازات ۆاليۋللين (8 مينۋت) سوقتى.

بۇعان دەيىن رۋدنىي كومانداسى حورۆاتيانىڭ «نوۆي ۆريەمە» كلۋبىمەن 2:2 ەسەبىمەن تەڭ تۇسكەن ەدى.

ەندى «ايات» 29 قازاندا حورۆاتيانىڭ «پۋلا» كومانداسىمەن وينايدى.

داستان كەنجالين،

استانا