قازاقستان ازيا چەمپيوناتىنىڭ پلەي-وفف كەزەڭىنە شىقتى

يراننىڭ بەندەر-ابباس قالاسىندا جاعاجاي ۆولەيبولىنان ازيا چەمپيوناتى ءوتىپ جاتىر.

سارى قۇرلىقتاعى 11 ەلدىڭ 29 قۇراماسى 18 قاراشاعا دەيىن مىقتى كوماندانى انىقتايدى. بۇل قاتاردا جارىس قوجايىنى يران ءتورت قۇراما قوسسا، قازاقستان، اۆستراليا، قىتاي، تايلاند، جاپونيا مەن كاتار ءۇش كوماندادان جىبەردى. ومان، يندونەزيا، گونكونگ ەكى جۇپتان اتتاندىردى. تەك ءۇندىستان ءبىر قۇراماسىنا سەنىم ارتادى.

«D» توبىنداعى دميتري ياكوۆلەۆ پەن سەرگەي بوگاتۋ جۇبى (قازاقستان 1) ەشكىمگە دەس بەرمەي كەلەدى. ولار بۇگىن گون كونگ (2) قۇراماسىن سەنىمدى جەڭدى. ەسەپ: — 21:14، 21:15.

كەشە ياكوۆلەۆ پەن بوگاتۋ دۋەتى اۆستراليا (2) ۆولەيبولشىلارىن 1:2 (21:17، 21:23، 10:15) ەسەبىمەن ۇتتى. ال العاشقى ويىندا وماننان باسىم ءتۇستى (15:21، 15:21). ەلىمىزدىڭ العاشقى قۇراماسى ءوز توبىنان ءبىرىنشى ورىنمەن پلەي-وفقا جولداما الدى.

نۇردوس الداش پەن كيريل گۋرين (قازاقستان 2) «F» توبىندا قىتاي مەن تايلاندتان 2:0 ەسەبىمەن جەڭىلىپ قالدى. ولار ەندى يران (4) جىگىتتەرىمەن وينايدى.

ال قازاقستاننىڭ ءۇشىنشى قۇراماسىنداعى ۆلاديسلاۆ پۋستيننيكوۆ پەن ارتيوم پەتروسيانتس العاشقى ماچتا اۆستراليالىقتارعا جول بەرگەنىمەن (2:0)، كەشە جاپونيانىڭ كوشباسشى كومانداسىنان باسىم ءتۇستى (1:2).

سارى قۇرلىقتاعى كوشباسشى اۆستراليا قۇراماسى. ولار وسىعان دەيىن بەس مارتە چەمپيون بولعان. يندونەزيا — 4، قىتاي — 3، يران، كاتار، جاڭا زەلانديا ەكى رەتتەن توپ جارسا، قازاقستان قۇراماسى ءبىر رەت التىن مەدال  جەڭىپ الدى.

داستان كەنجالين،

استانا