Qazaqstan hokkeıshileri ýnıversıadany jeńispen bastady

AQSh-taǵy Leık-Plesıd qalasynda bastalǵan qysqy ýnıversıada Qazaqstan quramasy Ońtústik Koreıa komandasymen kezdesip, qarsylastaryn 5:1 esebimen jeńdi.

Qazaqstan quramasynda shaıbalardy Aldııar Nurlan (6-mınýt), Maksım Mýsorov (26-mınýt), Kırıll Polohov (35 jáne 37-mınýt) pen Maksım Muhametov (39-mınýt) soqty. Ońtústik Koreıa quramasynda Mın Dje Chan (21-mınýt) qaqpany dál kózdedi.

Ýnıversıadada Qazaqstan quramasy Vengrııa, Ulybrıtanııa, Slovakııa jáne AQSh quramalarymen topta óner kórsetedi. Toptan birinshi jáne ekinshi oryn alǵan komandalar pleı-off kezeńine shyǵady.

Qazaqstan quramasy kelesi kezdesýin 13 qańtarda Vengrııa komandasyna qarsy ótkizedi.

Buǵan deıin 2023 jylǵy qysqy ýnıversıada 12-22 qańtar aralyǵynda AQSh-tyń Leık-Plesıd qalasynda ótip jatqany habarlanǵan edi. 1500-den astam sportshy sporttyń 12 túrinen kúsh synasady. Onyń ishinde jas úmittiler de, óz pánderindegi jetistikke jetken stýdentter de bar. Baıqaýǵa 17 men 25 jas aralyǵyndaǵy ýnıversıtet stýdentteri qatysa alady.

Qazaqstannyń namysyn taý shańǵysy, bıatlon, shańǵy jarysy, kerlıng, mánerlep syrǵanaý, frıstaıl, hokkeı, shańǵy qossaıysy, short-trek, shańǵymen sekirý, snoýbord, konkımen júgirý sııaqty 12 sport túri boıynsha 78 sportshy qorǵaıdy.

Hokkeı týrnırine Qazaqstannyń stýdentter quramasy qatysyp jatyr. Komandalar eki topqa bólingen. Hokkeıshilerimiz V tobynda oınaıdy. Ár topta alǵashqy eki oryn alǵan komandalar jartylaı fınalǵa joldama alady. Fınaldyq oıynnan bólek, úshinshi oryn úshin de kezdesý ótedi.

Qazaqstan quramasynyń aldaǵy týrnırge qatysý kestesi:

13 qańtar – 00:00, Koreıa – Qazaqstan.

13 qańtar – 20:30, Qazaqstan – Vengrııa.

16 qańtar – 07:00, Qazaqstan – Ulybrıtanııa.

17 qańtar – 03:30, Qazaqstan – Slovakııa.

18 qańtar – 20:30, AQSh – Qazaqstan.

Dastan KENJALIN,

ASTANA