Islam elderiniń birinshi hokkeı týrnırinde qazaqstandyqtar júldeger boldy

Tatarstannyń astanasy Qazan qalasynda hokkeıden Islam elderiniń birinshi halyqaralyq Kazan Hockey Cup týrnıri aıaqtaldy. Bul týraly Qazaqstannyń Reseıdegi elshiligi habarlady.

Erler arasyndaǵy jarysqa 12 komanda qatysyp, árqaısysy tórtten úsh topqa bólindi.

Qazaqstan atynan quramynda áýesqoı hokkeıshiler de, kásibı deńgeıde óner kórsetken ulttyq quramanyń burynǵy oıynshylary da bar «OSKEMEN» komandasy qatysty.

Olar óz tobynda Qyrǵyzstan men Túrkimenstandy jeńip, Tatarstan komandasynan ese jiberip, ekinshi oryn aldy.

«OSKEMEN» klýbynyń bas jattyqtyrýshysy Andreı Raıskııdiń aıtýynsha, týrnır óte jaqsy uıymdastyrylǵan.

Tańǵalatyn eshteńesi joq. О́ıtkeni, Tatarstanda sport ındýstrııasy árdaıym jaqsy bolǵan. Jergilikti hokkeıshilerdiń ózi qurlyqtyq hokkeı lıgasynda  óner kórsetip keledi, — dedi ol.

О́z kezeginde komanda kapıtany Omar Jaqsylyq qatysýǵa shaqyrǵany úshin uıymdastyrýshylarǵa rızashylyǵyn bildirip, mundaı is-sharalar elder arasyndaǵy mádenı-gýmanıtarlyq baılanysty nyǵaıtatynyn atap ótti.

Týrnır nátıjesinde shtab-páteri Qazan qalasynda ornalasqan Islam elderiniń shaıbaly hokkeıin damytý halyqaralyq qaýymdastyǵyn qurý týraly kelisimge qol qoıyldy.

Jańa uıym aıasyndaǵy yntymaqtastyq tájirıbe almasýǵa, oıynshylardy, jattyqtyrýshylar men tóreshilerdi oqytýǵa, jas hokkeıshilerdi daıarlaý ádistemelerine qol jetkizýge múmkindik beredi.

Dastan KENJALIN,

ASTANA