يسلام ەلدەرىنىڭ ءبىرىنشى حوككەي تۋرنيرىندە قازاقستاندىقتار جۇلدەگەر بولدى

تاتارستاننىڭ استاناسى قازان قالاسىندا حوككەيدەن يسلام ەلدەرىنىڭ ءبىرىنشى حالىقارالىق Kazan Hockey Cup ءتۋرنيرى اياقتالدى. بۇل تۋرالى قازاقستاننىڭ رەسەيدەگى ەلشىلىگى حابارلادى.

ەرلەر اراسىنداعى جارىسقا 12 كوماندا قاتىسىپ، ارقايسىسى تورتتەن ءۇش توپقا ءبولىندى.

قازاقستان اتىنان قۇرامىندا اۋەسقوي حوككەيشىلەر دە، كاسىبي دەڭگەيدە ونەر كورسەتكەن ۇلتتىق قۇرامانىڭ بۇرىنعى ويىنشىلارى دا بار «OSKEMEN» كومانداسى قاتىستى.

ولار ءوز توبىندا قىرعىزستان مەن تۇركىمەنستاندى جەڭىپ، تاتارستان كومانداسىنان ەسە جىبەرىپ، ەكىنشى ورىن الدى.

«OSKEMEN» كلۋبىنىڭ باس جاتتىقتىرۋشىسى اندرەي رايسكيدىڭ ايتۋىنشا، تۋرنير وتە جاقسى ۇيىمداستىرىلعان.

تاڭعالاتىن ەشتەڭەسى جوق. ويتكەنى، تاتارستاندا سپورت يندۋسترياسى ءاردايىم جاقسى بولعان. جەرگىلىكتى حوككەيشىلەردىڭ ءوزى قۇرلىقتىق حوككەي ليگاسىندا  ونەر كورسەتىپ كەلەدى، — دەدى ول.

ءوز كەزەگىندە كوماندا كاپيتانى ومار جاقسىلىق قاتىسۋعا شاقىرعانى ءۇشىن ۇيىمداستىرۋشىلارعا ريزاشىلىعىن ءبىلدىرىپ، مۇنداي ءىس-شارالار ەلدەر اراسىنداعى مادەني-گۋمانيتارلىق بايلانىستى نىعايتاتىنىن اتاپ ءوتتى.

تۋرنير ناتيجەسىندە شتاب-پاتەرى قازان قالاسىندا ورنالاسقان يسلام ەلدەرىنىڭ شايبالى حوككەيىن دامىتۋ حالىقارالىق قاۋىمداستىعىن قۇرۋ تۋرالى كەلىسىمگە قول قويىلدى.

جاڭا ۇيىم اياسىنداعى ىنتىماقتاستىق تاجىريبە الماسۋعا، ويىنشىلاردى، جاتتىقتىرۋشىلار مەن تورەشىلەردى وقىتۋعا، جاس حوككەيشىلەردى دايارلاۋ ادىستەمەلەرىنە قول جەتكىزۋگە مۇمكىندىك بەرەدى.

داستان كەنجالين،

استانا