توقاەۆ V دۇنيەجۇزىلىك كوشپەندىلەر ويىندارىن لايىقتى وتكىزۋدى تاپسىردى

مەملەكەت باسشىسى قاسىم-جومارت توقاەۆ ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆتى قابىلدادى، دەپ حابارلادى اقوردا.

قاسىم-جومارت توقاەۆقا قاۋىمداستىقتىڭ بىلتىر اتقارعان جۇمىستارىنىڭ قورىتىندىسى مەن الداعى كەزەڭگە ارنالعان جوسپارى تۋرالى باياندالدى.

يسلامبەك سالجانوۆتىڭ ايتۋىنشا، كوكپار، جامبى اتۋ، اۋدارىسپاق، تەڭگە ءىلۋ، بايگە، قۇسبەگىلىك، ءداستۇرلى ساداق اتۋ، توعىزقۇمالاق جانە اسىق اتۋ سەكىلدى ۇلتتىق سپورت تۇرلەرىنىڭ فەدەراتسيالارى قاۋىمداستىق اياسىنا بىرىكتىرىلگەن.

سونىمەن قاتار ۇلتتىق سپورتتىڭ دامۋىنا ساراپتاما جاسالىپ، جەكە-جەكە رەسپۋبيكالىق فەدەراتسيالارمەن ينستيتۋتسيونالدىق تۇرعىدا جۇمىس جۇرگىزىلە باستاعان.

2024 جىلى V دۇنيەجۇزىلىك كوشپەندىلەر ويىندارىن وتكىزۋگە بەرگەن قازاقستاننىڭ ءوتىنىمىن بۇكىلالەمدىك ەتنوسپورت كونفەدەراتسياسى ءبىراۋىزدان قولدادى.

كەزدەسۋدە قاسىم-جومارت توقاەۆ 2024 جىلى ەلىمىزدە وتەتىن اۋقىمدى شارانى ساپالى ءارى جوعارى دەڭگەيدە ۇيىمداستىرۋ جونىندە ناقتى تاپسىرمالار بەردى، – دەلىنگەن اقپاراتتا.

مەملەكەت باسشىسىنىڭ ايتۋىنشا، V دۇنيەجۇزىلىك كوشپەندىلەر ويىندارى ۇلتتىق سپورت شارالارىمەن شەكتەلمەۋى كەرەك. اتالعان حالىقارالىق سپورت سايىسى قولونەر، تۋريزم، قىزمەت كورسەتۋ سالاسى سياقتى شاعىن جانە ورتا بيزنەس وكىلدەرى ءۇشىن دە ءتيىمدى ۇيىمداستىرىلىپ، كاسىپتەرىن ىلگەرلەتۋگە جاعداي جاسالۋى قاجەت.

سونىمەن قاتار قازاقستان پرەزيدەنتى ۇلتتىق سپورت تۇرلەرىنىڭ دامۋ تۇجىرىمداماسىن ازىرلەۋ قاجەت ەكەنىن جانە ات سپورتى ويىندارىنداعى قاۋىپسىزدىك ماسەلەسىن قاراستىرۋدى تاپسىردى.

ايتا كەتەيىك، 2022 جىلدىڭ قىركۇيەگىنەن باستاپ قاۋىمداستىق جۇمىسىندا وزگەرىستەر بولدى. سپورت تۇرلەرى بويىنشا ۇلتتىق قاۋىمداستىق قۇرامىندا بۇرىن 5 فەدەراتسيا بولعان. ولار: كوكپار، جامبى اتۋ، اۋدارىسپاق، تەڭگە ءىلۋ، بايگە فەدەراتسياسى. قازىر بىزگە تاعى 4 فەدەراتسيا قوسىلدى: ءداستۇرلى ساداق اتۋ، توعىزقۇمالاق، اسىق اتۋ جانە قۇسبەگىلىك.

سونداي-اق ۇلتتىق سپورت تۇرلەرى قاۋىمداستىعىنىڭ باسشىلىق قۇرامىندا وزگەرىستەر بولدى. ۇلتتىق التى سپورت ءتۇرى بويىنشا رەسپۋبليكالىق فەدەراتسيالاردىڭ باسشىلارى سايلاندى.