اۋىر اتلەت يگور سون دوپينگ قولدانعانى ءۇشىن ۇزاق ۋاقىتقا جارىستان شەتتەتىلدى — باق

اۋىر اتلەتيكادان توكيو وليمپياداسىنىڭ قولا جۇلدەگەرى يگور سون دوپينگ قولدانعانى ءۇشىن ۇزاق مەرزىمگە سپورتتان شەتتەتىلدى.

سون سەگىز جىلعا، 2030 جىلى ناۋرىزدىڭ سوڭىنا دەيىن جارىستارعا قاتىسا المايدى. ديسكۆاليفيكاتسيا 2022 جىلعى ناۋرىزدا باستالدى. سول جىلى 2 ناۋرىزىندا جارىستان تىس كەزەڭدە الىنعان سپورتشىنىڭ سىناماسى وڭ ناتيجە بەرگەن. سپورتشىنىڭ قانىنان انابوليكالىق ستەرويدتەردىڭ ءبىرى بولىپ تابىلاتىن مەتاستەرون تابىلعان.

توكيو وليمپياداسىندا ول 61 كەلىگە دەيىنگى سالماق دارەجەسىندە قولا جۇلدە، 2019 جىلعى الەم چەمپيوناتىندا كۇمىس مەدال الدى.

24 جاستاعى سپورتشى مانسابىندا ەكىنشى رەت ديسكۆاليفيكاتسياعا ۇشىراپ وتىر. بۇعان دەيىن 2015 جىلى اۋىر اتلەت جاسوسپىرىمدەر اراسىنداعى الەم چەمپيوناتىنان كەيىن بىرنەشە ايعا سپورتتان شەتتەتىلگەن بولاتىن. بىراق ول كەزدە پرەپارات اعزاسىنا تاعام ارقىلى ەنگەنىن دالەلدەي الدى.

ەندى ول توكيو وليمپياداسىندا العان مەدالىنەن ايىرىلۋى ءتيىس. ويتكەنى ەگەر سپورتشى دوپينگتىك ەرەجەنى قايتالاپ بۇزسا، ول جۇلدەسىن قايتارىپ بەرەدى.

بىلتىر يگور سوننان باسقا، ابىلاي اۋەلحانوۆ، يۋليا پوتاسوۆا، رۋفينا چالقاروۆا، الەكسەي دروزدوۆ، ماتۆەي ماكرۋشيندەردەن الىنعان سىناما وڭ ناتيجە كورسەتكەن ەدى.

جالپى، 2008 جىلدان بەرى دوپينگپەن ۇستالعان قازاقستان اۋىر اتلەتتەرىنىڭ سانى 50-دەن اسىپ كەتتى.

زاڭسىز پرەپاراتتاردى قولدانعان سپورتشىلارمەن بىرگە جاتتىقتىرۋشىلار، جەكە دارىگەرلەر، ءتىپتى سپورت فۋنكتسيونەرلەرى دە جۇمىستان شەتتەتىلەدى.

داستان كەنجالين،

استانا