«ازيا بالالارى» ويىندارى: قازاقستان التىنشى ورىننان كورىندى

بۇگىن رەسەي فەدەراتسياسىنىڭ كەمەرەۆو وبلىسىندا قىسقى سپورت تۇرلەرىنەن ءىى «ازيا بالالارى» ويىندارى اياقتالدى. بۇل تۋرالى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى حابارلادى.

قىسقى ويىنداردىڭ رەسمي جابىلۋ راسىمىندە ەلىمىزدىڭ كوك بايراعىن شورت-ترەكشى ماديار ماديحوۆ ۇستاپ شىقتى. ال حالىقارالىق جارىستىڭ تۋىن ءتۇسىرۋ رəسىمىنە چەمپيون رەتىندە قازاقستان اتىنان مەيىرجان تولەگەن قاتىستى.

ون كۇنگە سوزىلعان كەشەندى جارىستا قازاقستان 3 التىن، 5 كۇمىس جانە 6 قولا مەدال يەلەنىپ، جالپىكوماندالىق ەسەپتە التىنشى ورىن الدى. جالپى، كۋزباسس وڭىرىندە وتكەن ويىندارعا 58 وتانداسىمىز سپورتتىڭ بەس تۇرىنەن كۇش سىناستى.

يليا ميزەرنىح (شاڭعىمەن تۇعىردان سەكىرۋ، ك-40)، مەيىرجان تولەگەن (شورت-ترەك)، ۆارۆارا گلۋحوۆا (كونكيمەن جۇگىرۋ) چەمپيون اتاندى.

مەيىرجان تولەگەن (شورت-ترەك، 1500م)، يليا شيلنيكوۆ (شاڭعىمەن تۇعىردان سەكىرۋ، ك-40)، ەستافەتادا ەرلەر قۇراماسى (شورت-ترەك)، ارالاس كوماندالىق سىندا يليا ميزەرنىح پەن سوفيا شيشكينا (شاڭعىمەن تۇعىردان سەكىرۋ)، سپرينتتە ەرلەر قۇراماسى (كونكيمەن جۇگىرۋ) كۇمىس جۇلدەگە يە بولدى. ال ماليكە جولتابار (شورت-ترەك، 1500م)، سوفيا شيشكينا (شاڭعىمەن تۇعىردان سەكىرۋ، ك-40)، ەستافەتادا قىزدار قۇراماسى (شورت-ترەك)، ارالاس كوماندالىق سىندا يليا شيلنيكوۆ پەن اليونا سۆەريدەنكو (شاڭعىمەن تۇعىردان سەكىرۋ)، ماديار ماديحوۆ (شورت-ترەك، 100م)، شاڭعى جارىسىنداعى دوستىق ەستافەتاسىندا ارينا اندريۋششەنكو («سپورت» قۇراماسىندا) قولا جۇلدەنى يەلەندى.

جالپى ەسەپتە رەسەيدىڭ ءسىبىر فەدەرالدى وكرۋگى ءبىرىنشى ورىن السا، ودان كەيىن رەسەيدىڭ ماسكەۋ وبلىسى، ورال مەن قيىر شىعىس فەدەرالدى وكرۋگىنىڭ قۇراماسى جايعاستى. ويىندار كەزىندە 57 مەدال جيىنتىعى ساراپقا سالىندى. «ازيا بالالارى» ويىندارىنا قازاقستان، ارمەنيا، اۋعانستان، بەلارۋس، كۋۆەيت، قىرعىزستان، ليۆان، نەپال، تاجىكستان، تايلاند، تۇرىكمەنستان، وزبەكستان مەن رەسەيدىڭ ماسكەۋ وبلىسىنىڭ، كۋزباسس ءوڭىرىنىڭ، قيىر شىعىس فەدەرالدى وكرۋگى، ءسىبىر فەدەرالدى وكرۋگى مەن ورال فەدەرالدى وكرۋگىنىڭ قۇرامالارى قاتىستى. سونداي-اق، باشقۇرتستان، ساحا مەن تاتارستان رەسپۋبليكاسىنىڭ كوماندالارى دا باق سىنادى.

قازاقستان 2019 جىلى وتكەن العاشقى «ازيا بالالارى» ويىندارىنا سپورتتىڭ 8 تۇرىنەن 74 سپورتشى اپارعان ەدى. سول كەزدە ەلىمىز جالپىكوماندالىق ەسەپتە 7 التىن، 7 كۇمىس جانە 6 قولا مەدالمەن 11 قۇرامانىڭ ىشىندە التىنشى ورىننان كورىنگەن. وسىلايشا، ەلىمىز ەكى جارىس قاتارىنان التىنشى ورىننان اسا المادى.

شامكەن بايىربەك،

استانا