Mańǵystaý sportyna jańasha kózqaras kerek

Mańǵystaý oblysy Munaıly aýdanynyń Basqudyq aýylyna Parlament Májilisiniń depýtattyǵyna kandıdat Edil Jańbyrshın men oblystyq máslıhat depýtattyǵyna úmitker Arhımed Býrkıtbaev bastaǵan azamattar Basqudyq balalar-jasóspirimder sport mektebine kelip, jattyqtyrýshylarmen kezdesý ótkizdi.

Sport mektebi 2015 jyly qoldanysqa berildi. Biraq áli kúnge stadıony joq. Úsh sport túrinen (grek-rım, dzıýdo, erkin kúres) 150-deı sportshy úıirmege qatysady. Bala kóbeıgen saıyn ishi tarlyq etedi. Aýlamyzdan stadıon salynsa — fýtbol, voleıbol, basketbol úıirmeleri ashylsa, balalar kóbeıetin edi.

Kezdesýde depýtattyqqa úmitkerlerge suraq qoıyp, Mańǵystaý sportyndaǵy biraz máselerdi kóterdim. Bir jarym saǵat kóleminde oblys pen aýdan sportyna tolyq ózgerister kerek ekenin aıttym. Suraǵyma jaýap bergen Edil Terekbaıuly meni Mádenıet jáne sport mınıstri Ashat Oralovpen kezdestiretinin aıtty.

1. Aqtaýdan sport mektep-ınternat-kolledjin salý kerek.
2. Oqý-jattyǵý jıynyn ótkizetin sporttyq baza kerek.
3. Mańǵystaýdan Jazǵy Olımpııalyq oıyndardan chempıon shyǵarýǵa jaǵdaı jasalýy kerek.
4. Oblysymyzdan Qysqy Olımpıada jáne Paralımpıada men Sýrdlımpıada sportyn damytý kerek.
5. Sport dárigerleri, menedjerler jáne dıetolog mamandyqtaryna grant bólip, stýdentterdi oqytý kerek.
6. Munaıly aýdanynda 12000-nan astam jasóspirimder men jastar sportpen aınalysady. Olardyń sany jyl saıyn kóbeıip keledi. Osy oraıda aýdanda sporttyq dene shynyqtyrý dıspanserin ashý kerek.
7. Sport basqarmasy men aýdandyq mádenıet jáne sport bóliminiń basshylary eki jylda bir ret jattyqtyrýshylarymen kezdesip, jınalys ótkizýi kerek.

Kandıdattar ýádesin berip ketti. Bul azamattardyń saılaýda jeńetinine senemin. Endi el amanatynyń oryndalýyn kútemiz.

Aıbek MUHANOV,

Mańǵystaý oblysy,

Munaıly aýdany