SportPress.kz Qazaqstan sport jańalyqtary
Aýyr atlet Denıs Ýlanovtyń Mádenıet jáne sport mınıstrligine qarsy isi boıynsha sot sheshimi shyqty.
2016 jyly Brazılııada ótken XXXI Jazǵy Olımpııalyq oıyndarda Denıs Ýlanov 85 kelige deıingi salmaq dárejesinde tórtinshi oryn alǵanda oǵan 30 myń dollar syıaqy tólengen edi.
Alaıda, dopıng daýyna baılanysty Olımpıadanyń qola júldesin ıelengen G.Sınkraıannyń sportshy shettetilgen soń, úshinshi oryn resmı túrde Denıs Ýlanovqa berilgen bolatyn. Qazir ol Olımpıadanyń qola júldegeri bolyp sanalady.
2021 jyly 9 tamyzda Olımpıadadaǵy júldesiniń kóbeıýine baılanysty Denıs Ýlanov Mádenıet jáne sport mınıstrliginiń Sport jáne dene shynyqtyrý isteri komıtetine aqshalaı syıaqy mólsherin qaıta qaraý týraly suraý saldy. Al Olımpıadada úshinshi oryn úshin 75 myń dollar qarastyrylǵan. Sóıtip, sportshy ózine tıesili taǵy 35 myń dollardy alǵysy kelgende normatıvtik-quqyqtyq aktiler bolmaǵandyqtan oǵan tıisti soma tólenbegen.
Osylaısha. Sport komıteti 2021 jyly 20 tamyzda negizderdiń bolmaýyna baılanysty sportshyǵa syıaqy mólsherin qaıta qaraýdan bas tartty. Al sot Denıs Ýlanovtyń aryzyn eskere otyryp, onyń talabyn oryndaý týraly sheshim shyǵardy. Biraq, atalǵan vedomstvo sheshimge qarsy shaǵym jasady.
Atalǵan isti qaraý bir jyldan astam ýaqytqa sozyldy. Sonyń nátıjesinde Joǵarǵy sottyń ákimshilik ister jónindegi sot alqasy syıaqyny qaıta qaraýdan bas tartýdy zańsyz dep tapty. Endi Ýlanov ózine tıesili 35 myń dollardy alatyn boldy.
«Nur-sultan qalasynyń mamandandyrylǵan aýdanaralyq ákimshilik sotynyń 2022 jylǵy 10 naýryzdaǵy sheshimi, Nur-sultan qalasy sotynyń ákimshilik ister jónindegi sot alqasynyń 2022 jylǵy 31 mamyrdaǵy osy is boıynsha qaýlysy kúshinde qalsyn. Qazaqstan Respýblıkasy Mádenıet jáne sport mınıstrliginiń kassaııalyq shaǵymy qanaǵattandyrýsyz qaldyrylsyn», — delingen Joǵarǵy sottyń qaýlysynda.
Dastan KENJALIN,
ASTANA
