Sápıevpen ustasqan balýan kolledjden shyǵaryldy – boksshy Satybaldınova

Batyrball týrnırinde bokstan Olımpıada chempıony Serik Sápıevpen ustasyp qalǵan balýan Zelımhan Mýsıhanov kolledjden shyǵarylǵan. Bul týraly boksshy Aıda Satybaldınova Instagram-paraqshasynda aıtty.

Onyń aıtýynsha, balýannyń sport kolledjin bitirýine eki aı qalǵan. Sonymen birge áli rastalmaǵan aqparat boıynsha, Mýsıhanovtyń týystary da jumystan qýylǵan.

Olımpıada chempıony men Zelımhan Mýsıhanovtyń tóbelesin bárimiz kórdik. Jigitter qol alysyp, janjal sonymen bitti dep oılap edik. Alaıda olaı emes eken. Osy oqıǵadan keıin ne boldy deısizder ǵoı. Zelımhan ózi oqyp júrgen sport kolledjinen shyǵaryldy. Onyń aǵasy jumystan qýylǵan. Ata-anasy da jumystan qýylǵan degen derek bar. Biraq anyq-qanyǵyn bilmeımin. Artynan Aleksandr Golman (Mýsıhanovtyń jattyqtyrýshysy, — red.) osy iske aralasyp, Zelımhandy qaıtadan oqýǵa aldyrýǵa tyrysady. Sebebi, balýandy osy oqıǵaǵa bola oqýdan shyǵarý qate. Amalyn taýyp ony qaıtadan aldyrdy, — dedi Satybaldınova.

Batyrball oıyny (sporttyń kúres pen basketboldyń aralas túri, — red.) kezinde Serik Sápıev balýan Zelımhan Mýsıhanovpen ustasyp qalǵan. Balýan Sápıevke qarsy kúres ádisin qoldanǵan edi. Bul boksshyǵa unamaǵan. Sodan keıin ekeýiniń arasynda tóbeles bola jazdaǵan. Keıin kıim aýystyratyn bólmede ekeýi qol alysyp, bir-birinen keshirim suraǵan. Zelımhan Mýsıhanov pen onyń jattyqtyrýshysy Aleksandr Golman kópshilikten keshirim surap, beınejazba jarııalaǵan.

Dastan KENJALIN,

ASTANA