مىرزاعالي ايتجانوۆ قازاق پەن وزبەك بوكسىن سالىستىردى

بوكستان قازاقستان ۇلتتىق قۇراما كومانداسىنىڭ باس جاتتىقتىرۋشىسى مىرزاعالي ايتجانوۆ بوكس فەدەراتسياسىنىڭ ۇيىمداستىرعان پرەسس-تۋر كەزىندە قازاق پەن وزبەك بوكسىن ءجيى سالىستىرىپ جۇرگەن ادامدارعا جاۋاپ بەردى.

ونىڭ ايتۋىنشا، سوڭعى كەزدە قازاق پەن وزبەك بوكسشىلارىن سالىستىراتىن ادامدار كوبەيىپ كەتتى. قازىر ەلىمىزدىڭ بىلعارى قولعاپ شەبەرلەرى وسىدان بىرنەشە جىل بۇرىنعى دەڭگەيگە جەتۋ ءۇشىن قولدا بار مۇمكىندىكتىڭ ءبارىن جاساپ جاتىر.

شىنى كەرەك، سوڭعى كەزدە ەسەمىز كەتىپ ءجۇر. ونى مويىنداۋ كەرەك. ەندى ءبىز بۇرىنعى قالپىمىزعا، بۇرىنعى بيىگىمىزگە جەتۋ ءۇشىن بار كۇشىمىزدى سالامىز. سول دەڭگەيگە جەتۋ — باستى ماقساتىمىز، — دەدى ول.

وسى رەتتە باس جاتتىقتىرۋشى بولگاريانىڭ استاناسى – سوفيا قالاسىندا ستراندجا كۋبوگى ءۇشىن وتكەن حالىقارالىق تۋرنيردەگى بوكسشىلاردىڭ ساتسىزدىگى تۋرالى دا ايتىپ بەردى. ول تۋرنيرگە ۇلتتىق قۇرامانىڭ ءبىرىنشى نومەرلى سپورتشىلارىن اپارماعانىن، نەگىزگى قۇرامنان 75 كەلىدەگى نۇرقانات رايىس پەن 91 كەلىدەن اسا سالماقتاعى قامشىبەك قوڭقاباەۆتىڭ عانا شارشى الاڭعا شىققانىن، باسقا بوكسشىلاردىڭ بارلىعى ەكىنشى، ءۇشىنشى، ءتورتىنشى ءنومىرلى سپورتشىلار بولعانىن ەسكەرتتى.

بۇل تۋرنيردە رايىس قولا جۇلدەگەر اتاندى. جارىسقا نەگىزىنەن ۇلتتىق قۇرامانىڭ ەكىنشى، ءۇشىنشى، ءتورتىنشى نومەرلى سپورتشىلارى قاتىستى. ولاردى دا شىڭداپ، الەۋەتتى مۇمكىندىگىن بايقاپ وتىرۋىمىز كەرەك، — دەدى ايتجانوۆ.

سونداي-اق مىرزاعالي ايتجانوۆ قامشىبەك قوڭقاباەۆتىڭ وزبەكستاندىق ءباحادۇر جالولوۆپەن نەلىكتەن قولعاپ تۇيىستىرمەگەنىن ايتتى.

قامشىبەك جاراقات العان. سول سەبەپتى ونى شارشى الاڭعا شىعارمادىق. بۇل حالىقارالىق تۋرنير عانا. الدا وزبەكستاندا الەم چەمپيوناتى بولادى. جەرەبە جولىقتىرسا، ەكەۋى تاعى دا كەزدەسۋى مۇمكىن. سول كەزدە ءبارى شەشىلەدى، — دەدى باس جاتتىقتىرۋشى.

ونىڭ سوزىنەن بەلگىلى بولعانداي، قازىرگى ۇلتتىق قۇرامانىڭ بوكسشىلارى انگليا، ازەربايجان مەن تاجىكستان بوكسشىلارىمەن بىرىگىپ جاتتىعۋ جيىنىن وتكىزۋدە.

كوماندا مۇشەلەرى الەم چەمپيوناتىنا تياناقتى دايىندالىپ جاتىر. «اقبۇلاق» بازاسىندا بار جاعداي جاسالعان. مۇنداي زاماناۋي كەشەنگە شەتەلدىك كوماندالار دا تاڭ قالىپ جاتىر. الەم چەمپيوناتى قارساڭىنداعى سوڭعى جاتتىعۋ جيىنىن تۇركىستان وبلىسىندا وتكىزەمىز. ال جارىسقا باراتىن بوكسشىلار ءساۋىر ايىندا تولىق انىقتالاد، — دەدى ول.

ونىڭ تاعى ءبىر ايتقانى، ءبىرىنشى نومەرلى بوكسشىلار اراسىندا سالماق اۋىستىرۋعا قاتىستى اۋىس-تۇيىستەر بولعان جوق. ازىرشە.

داستان كەنجالين،

استانا