ەۋروپا وداعى بەلارۋستى فۋتبول تۋرنيرلەرىنە قاتىستىرماۋدى تالاپ ەتتى

ەۋروپا پارلامەنتءى ۋەفا-دان رەسەيدىڭ سوڭىنان بەلارۋستى دە قۇرلىق چەمپيوناتىنىڭ ىرىكتەۋ تۋرنيرىنەن شىعارۋدى تالاپ ەتءتى. بۇل تۋرالى 024.by حابارلادى.

ەۋروارلامەنتتىڭ دەپۋتاتتارى ۋەفا پرەزيدەنتى الەكساندەر چەفەرينگە بەلارۋسكە قارسى سانكتسيانى كۇشەيتۋ تۋرالى حات جولدادى.

وسىعان بايلانىستى فۋتبولدان بەلارۋس ەلىنىڭ ۇلتتىق قۇراماسى رەسەي كومانداسىمەن بىرگە ەۋروپا چەمپيوناتىنا قاتىسۋعا مۇمكىندىك بەرەتىن ىرىكتەۋ تۋرنيرىنەن شىعىپ قالۋى مۇمكىن.

024.by-ءتىڭ حابارلاۋىنشا، ەۋروپارلامەنتتىڭ دەپۋتاتتارى چەمپيوناتقا بەلارۋس قۇراماسىنىڭ قاتىسۋى حالىقارالىق قاۋىمداستىقتىڭ الەكساندر لۋكاشەنكو رەجيمىن قولداعانىن بىلدىرەدى دەپ سانايدى.

بەلارۋس قۇراماسى بولسا، ازىرشە 2024 جىلى وتەتىن ەۋروپا چەمپيوناتىنىڭ ىرىكتەۋ تۋرنيرىنە جىبەرىلىپ وتىر. كوماندا جەرەبە بويىنشا شۆەيتساريا، يزرايل، رۋمىنيا، كوسوۆو جانە اندوررا كوماندالارىمەن بىرگە I توپقا تۇسكەن.

ەۋروپا چەمپيوناتىنىڭ ىرىكتەۋ ءتۋرنيرىنىڭ كۇنتىزبەسىنە قاراساق،  بەلارۋس قۇراماسى 25 ناۋرىز كۇنى شۆەيتساريا كومانداسىمەن ويناۋى ءتيىس بولاتىن. بىراق ماتچ بەلارۋستە ەمەس، بەيتاراپ الاڭدا، ياعني سەربيانىڭ استاناسى – بەلگراد قالاسىندا وتەتىن بولىپ شەشىلگەن. ال شۆەيتساريا فۋتبول فەدەراتسياسى وسىنىڭ وزىنە كەلىسپەيتىنىن مالىمدەدى.

بۇدان باسقا، بەلارۋس كلۋبتارىنىڭ قۇرلىق تۋرنيرلەرىنە قاتىسۋلارىنا دا  تىيىم سالىنعان.

داستان كەنجالين،

استانا