Reseı sportshylary soǵysqa qarsy shyqsa ǵana jarystarǵa jiberiledi — HOK

Halyqaralyq olımpııalyq komıtet (HOK) reseılik jáne belorýs sportshylaryn Ýkraınadaǵy soǵysqa qarsy shyqsa ǵana jarystarǵa jiberiletinin málimdedi. Bul týraly rast.kz habarlady.

Keshe HOK-tyń prezıdenti Tomas Bah Olımpııalyq oıyndarǵa qatysty ótken baspasóz máslıhatynda osylaı dedi.

Onyń aıtýynsha, Reseı men Belarýs sportshylary bul jaǵdaıda beıtarap tý astynda jarystarǵa qatysa alady. Alaıda Reseı men Belarýstiń arnaıy qyzmet organdarymen kelisimshart jasasyp qoıǵan, eki eldiń armııasymen nemese ulttyq qaýipsizdik qyzmetimen baılanysy bar sportshylarǵa mundaı jeńildik berilmeıdi.

Sportshylarǵa jarysqa qatysýǵa ruqsat berý aldynda olardyń soǵys taqyrybynda kópshilik aldynda aıtqan málimdemeleri men pikirleri, soǵysty qoldaýǵa arnalǵan jıyndar men sherýlerge qatysqan-qatyspaǵandary tolyq tekserilip, eskerilýi tıis, – dedi Bah.

Degenmen ol komandalyq sport túrleri boıynsha óner kórsetetin sportshylar ózge elderdiń  týy astynda da jarystarǵa qatysa almaıtynyn eskertti.

Sonymen birge ol Reseı men Belarýs sportshylarynyń halyqaralyq jarystarǵa, sonyń ishinde 2024 jyly Parıjde ótetin Olımpııalyq oıyndaryna qatysý-qatysýpaýlary máselesi áli túpkilikti sheshilmegenin ashyq aıtty.