تەننيستەن قازاقستان قۇراماسى الەم چەمپيوناتىنا جولداما الدى (فوتو)

استاناداعى تەننيستەن وتكەن بيللي دجين كينگ كۋبوگىنىڭ ىرىكتەۋ كەزەڭى اياسىندا قازاقستان مەن پولشا كوماندالارىنىڭ ماتچىندا ەلىمىزدىڭ ءبىرىنشى، الەمنىڭ جەتىنشى راكەتكاسى ەلەنا رىباكينا قارسىلاسى الەمنىڭ 19-راكەتكاسى ماگدا لينەتتى ۇتتى.

كەشە 2:0 ەسەبىمەن العا شىققاندىقتان، قازاقستان قۇراماسىنا كوماندالىق الەم چەمپيوناتىنا جولداما الۋ ءۇشىن ەندى ءبىر عانا جەڭىس جەتكىلىكتى ەدى.

ءبىرىنشى پارتيادا ەسەپ 4:4 بولعان كەزدە  رىباكينا برەيك جاساپ، سوسىن سەتكە دوپ بەرگەندە، ءوز مۇمكىندىگىن جىبەرمەي ەسەپتى 6:4-گە جەتكىزدى.

ەكىنشى سەتتە وتانداسىمىز 2:0 ەسەبىمەن العا شىققانىمەن، ماگدا لينەتت تارازى باسىن تەڭەستىردى. دەگەنمەن، رىباكينا ەكى برەيك جاساپ، ءبىرىنشى ماتچبولىن پايدالانىپ، 6:2 ەسەبىمەن ۇتتى.

وسىلايشا، قازاقستان پولشامەن ماتچتا 3:0 ەسەبىمەن العا شىعىپ، الەم چەمپيوناتىنىڭ فينالدىق كەزەڭىنە جولداما الدى.

رىباكينا مەن لينەتتىڭ ويىنى  1 ساعات 24 مينۋتقا سوزىلدى.  وسىدان كەيىن جۇپتىق سىندا اننا دانيلينا مەن يۋليا پۋتينتسەۆا اليسيا روسولسكايا مەن ۆەرونيكي فالكوۆسكاعا قارسى وينادى. بۇل ويىن قازاقستان تەننيسشىلەرى قارسىلاستارىن ءۇش ويىندا 3:0 ەسەبىمەن جەڭگەننەن كەيىن ەشتەڭە شەشپەدى. دەگەنمەن پولياكتار جۇپتىق سىندا جەڭىسكە جەتتى.

استاناعا پولشا قۇراماسىنىڭ كوشباسشىسى، الەمنىڭ 1-راكەتكاسى يگا شۆەنتەك كەلە المادى. يگا بيىل دوحاداعى تۋرنير كەزىندە العان جاراقاتىن ينديان-ۋەللستە اسقىندىرىپ الۋىنا بايلانىستى بىرقاتار ءىرى تۋرنيرلەرگە قاتىسا المايتىنىن ايتتى.

ەندى يسپانيا مەن مەكسيكا، ۋكراينا مەن چەحيا، ۇلىبريتانيا مەن فرانتسيا، كانادا مەن بەلگيا، اقش پەن اۆستريا، سلوۆاكيا مەن يتاليا، گەرمانيا مەن برازيليا، سلوۆەنيا مەن رۋمىنيا كوماندالارى الەم چەمپيوانتىنا جولداما الۋ ءۇشىن ءبىر-بىرىمەن كەزدەسەدى.

قازىر فينالدىق كەزەڭدە بىلتىرعى الەم چەمپيونى شۆەيتساريا مەن فيناليست اۆستراليا قۇراماسى قارسىلاسىن كۇتىپ وتىر. ال جەڭىلگەن قۇرامالار بيىل قاراشادا پلەي-وفف ساتىسىندا باق سىنايدى. بىلتىر قازاقستان قۇراماسى كوماندالىق الەم چەمپيوناتى اتالىپ كەتكەن باسەكەنىڭ فينالدىق كەزەڭىندە س توبىندا يسپانيا مەن ۇلىبريتانيا قۇراماسىمەن ويناعان.

داستان كەنجالين،

فوتو: قازاقستان تەننيس فەدەراتسياسى

استانا