16 جاستاعى قازاق قىزى قىتايلىق الەم چەمپيونىن ۇتتى

16 جاستاعى شاحماتشى الۋا نۇرمانوۆا Pro Chess League فينالىندا قازىرگى الەم چەمپيونى قىتايلىق تسزيۋي ۆەنتسزيۋندى ۇتتى.

قازاقستان شاحمات فەدەراتسياسىنىڭ حابارلاۋىنشا، الۋامەن ءبىر كوماندادا گروسسمەيستەرلەر حيكارۋ ناكامۋرا، ۆلاديمير فەدوسەەۆ جانە شامسيددين ۆوحيدوۆ ونەر كورسەتتى.

Pro Chess League (PCL) — جۇلدە قورى 150 000 اقش دوللارى بولاتىن شاحمات ليگاسى. ول 1 اقپاننان 15 مامىرعا دەيىن ءوتتى.

ليگانىڭ نەگىزگى كەزەڭىندە الەمنىڭ تۇكپىر-تۇكپىرىنەن كەلگەن مىقتى ويىنشىلاردى جيناعان 16 كوماندا قاتىستى. ولاردىڭ ىشىندە ماگنۋس كارلسەن، حيكارۋ ناكامۋرا، انيش گيري، فابيانو كارۋانو، الەكساندر گريششۋك، كاتەرينا لاحنو جانە باسقا دا گروسسمەيستەرلەر بولدى.

الۋا سونىمەن قاتار حالىقارالىق گروسسمەيستەرلەر ادحيبان باسكارانمەن ء(ۇندىستان)، نيكولاس تەودورۋمەن (گرەكيا)، بەندجامين بوكپەن (نيدەرلاندى) تەڭ ءتۇستى.

الۋا نۇرمانوۆا  — قازاقستان ايەلدەر قۇراماسىنىڭ مۇشەسى. ول قازاقستاننىڭ بىرنەشە دۇركىن چەمپيونى، وقۋشىلار اراسىندا الەم چەمپيونى، كادەتتەر اراسىندا الەم چەمپيونى، كادەتتەر اراسىندا ازيا چەمپيونى.