تيمۋر تۋرلوۆ رەسەي كومانداسى ءۇشىن جارىستى كيپرگە اۋىستىردى — گروسسمەيستەر

قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ حالىقارالىق شاحمات فەدەراتسياسىنىڭ ايەلدەر اراسىندا ءوتىپ جاتقان گران-پري جارىسىنا دەمەۋشىلىك جاساپ، رەسەيدىڭ كومانداسى ءۇشىن ءتۋرنيردى پولشادان كيپرگە اۋىستىردى دەگەن دەرەك شىقتى.

بۇل تۋرالى دانيانىڭ گروسسمەيستەرى پەتەر حەينە ايتتى.

تۋرنير رەسەيدىڭ شاحماتشىلارى ءۇشىن پولشادان كيپرگە اۋىستى. ەگەرجارىس پولشادا بولسا، رەسەي وكىلدەرى قاتىسا المايتىن ەدى. ءتۋرنيردىڭ باستى دەمەۋشىسى – تيمۋر تۋرلوۆ. وعانۋكراينادا سانكتسيا جاريالانعان. سول سەبەپتى ۋكراينانىڭ ەكى ويىنشىسى تۋرنيرگە قاتىسا المادى، — دەدى ول.

ەسكە سالا كەتسەك، كيپردە 15 مامىردا شاحماتتان ايەلدەر اراسىندا گران-پري ءتۋرنيرى باستالعان بولاتىن. بۇل جارىس 28 مامىرعا دەيىن جالعاسادى. كيپردىڭ استاناسى – نيكوسيا قالاسىنا تۋرنيرگە قاتىسۋ ءۇشىن الەمنىڭ جەر-جەرىنەن گروسسمەيستەرلەر جينالدى. ونىڭ ىشىندە 19 جاستاعى گروسسمەيستەر، بليتستەن الەمنىڭ ەكى دۇركىن چەمپيونى، ازيا چەمپيونى ءبيبىسارا اساۋباەۆا دا بار.

ول گران-ءپريدىڭ ءۇشىنشى تۋرىندا تۋرنير كەستەسىندە كوش باستادى. قازىر ءتورتىنشى، سوڭعى تۋرى بولىپ جاتىر.

داستان كەنجالين،

استانا