IBA birneshe eldiń boks federaııasyn shettetti

Halyqaralyq boks qaýymdastyǵy (IBA) jeti eldiń boks federaııasyn shettetti.

Qaýymdastyqtyń málimetine qaraǵanda, Jańa Zelandııa, Germanııa, Shveııa men Nıderlandy basqa boks uıymynyń múshesi bolýyna baılanysty, al Chehııa, Lıberııa jáne Ekvatorlyq Gvıneıa elderiniń federaııalary IBA-ǵa jyldyq esepterdi berý kezinde jibergen qatelerge baılanysty IBA-nyń múshesi bolyp sanalmaıdy.

Jaqynda Halyqaralyq boks qaýymdastyǵy О́zbekstannyń Tashkent qalasynda eresekter arasynda álem chempıonatyn ótkizgen bolatyn. Osy dodaǵa 107 memleketten 538 boksshy qatysty. Olar 13 salmaq boıynsha kúsh synasty.

Bıylǵy álemdik jarystyń kónine eki eselengen mólsherde syıaqy qoıyldy. Ol 5,2 mln AQSh dollary somasy boldy. Chempıonatta altyn júldegerler 200 myń dollar alsa, kúmis medal ıegerine 100 myń dollar, qola júldegerge 50 myń dollar mólsherinde qarjy tapsyryldy. Buǵan deıin álem chempıonatynyń osynshama kólemdegi syıaqysy bolǵan emes. 2021 jyly Serbııanyń astanasy – Belgradta ótken álemdik doda ol 2,6 mln AQSh dollary bolǵan edi. Sol kezde altyn júldeniń ıesine 100 myń, kúmis medalıske 50 myń, al qola júldegerge 25 myń dollary tapsyrylǵan.

Endi kelesi álem chempıonatynyń júlde qory 10 mln AQSh dollary bolady degen derek bar. Al bıylǵy jarysta Qazaqstan 4 altyn, bir kúmis medal ıelendi. Altyn júldeni Sanjar Táshkenbaı, Mahmud Sabyrhan, Asylanbek Shymbergenov pen Nurbek Oralbaı alsa, Dýlat Bekbaýov kúmis medalıst boldy.

Dastan KENJALIN,

ASTANA