تاەكۆوندودان ءاچ: نۇربەك عازەز قارسىلاسىن نوكداۋنعا ءتۇسىردى (فوتو)

بۇگىن ازەربايجاننىڭ باكۋ قالاسىندا ءوتىپ جاتقان تاەكۆوندودان XXVI الەم چەمپيونىنىڭ ءتورتىنشى جارىس كۇنى ءوتىپ جاتىر. جارىس جولىنا ۇلتتىق قۇراما ساپىنان نۇربەك عازەز (63 كگ) بەن راكوني بيمىرزا (+73 كگ) شىقتى، دەپ حابارلادى مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

نۇربەك عازەز برازيليالىق ەدۋاردو بارەتتانى ۇتىپ، جەكپە-جەكتى جاقسى باستاعان ەدى. ول قارسىلاسىنا جويقىن سوققىلار جاساپ، نوكداۋنعا ءتۇسىردى. الايدا ەكىنشى اينالىمدا قازىرگى الەم چەمپيونى، ازيا چەمپيوناتىنىڭ كۇمىس جۇلدەگەرى، قىتايلىق ليان يۋشۋايدان ۇتىلىپ قالدى. ولار وسىعان دەيىن لوممەل قالاسىندا وتكەن بەلگيا اشىق چەمپيوناتىندا كەزدەسكەن ەدى. سول كەزدە قىتايلىق باسىم تۇسكەن. سونداي-اق ليان يۋشۋاي بىلتىر قۇرلىق چەمپيوناتىندا تاعى ءبىر وتانداسىمىز ادىلەت بازارباەۆتى ۇتىپ، فينالعا شىققان.

ال اسا اۋىر سالماقتاعى راكوني بيمىرزا ءبىرىنشى اينالىمدا ەۋروپا چەمپيونى، گران-پري باسەكەسىنىڭ ەكى دۇركىن جەڭىمپازى، پولشالىق الەكساندرا كوۆالچۋككە قاۋقار تانىتا العان جوق. ەسەپ – 0:2.

ەرتەڭ دايانعا شىقاتىن تاەكۆوندوشىلار اراسىندا قازاقستاندىقتاردان ريتا باكيشەۆا (46 كگ) مەن جاۆوحيرحون يسلاموۆ (54 كگ) بار.

جالپى بيىلعى دوداعا 145 ەلدەن مىڭعا تارتا تاەكۆوندوشى جينالدى. مۇندا الەم چەمپيونى 140 بالل السا، كۇمىس جۇلدە ءۇشىن 84، قولا جۇلدەگە 50 ۇپاي بەرىلەدى.

شامكەن بايىربەك،

استانا