تاەكۆوندودان ءاچ: نازىم ماحمۇتوۆا جارىس جولىنان شىعىپ قالدى (فوتو)

بۇگىن ازەربايجاننىڭ باكۋ قالاسىندا ءوتىپ جاتقان تاەكۆوندودان XXVI الەم چەمپيوناتىنىڭ التىنشى جارىس كۇنى بولدى. جارىس جولىنا ۇلتتىق قۇراما ساپىنان نازىم ماحمۇتوۆا (62 كگ) مەن نۇرقانات قوجاحمەتوۆ (74 كگ) شىقتى، دەپ حابارلادى مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

وسى چەمپيوناتتاعى ەڭ جاس سپورتشىنىڭ ءبىرى 16 جاستاعى نازىم ماحمۇتوۆا جاپونيالىق كاسۋمي حيراباياشيدى ەكى راۋندتا ۇتىپ، الەم چەمپيوناتىن جاقسى باستادى. وسىدان كەيىن ول الەمدىك رەيتينگىدە ۇپايى از بولعاندىقتان كوش باسىنداعى تاەكۆوندوشىنىڭ بىرىنە قارسىلاس بولدى. بىلتىرعى جاستار مەن ەرەسەكتەر اراسىنداعى الەم چەمپيونى سارا چااريمەن ايقاس تارتىستى ءوتتى. العاشقى راۋندتا بەلگيالىق باسىم بولعانىمەن، نازىم تارازى باسىن تەڭەستىرىپ كەتتى. الايدا شەشۋشى راۋندتا تاجىريبەلى سارا چااري باسىمدىقتى ۋىسىنان شىعارعان جوق.

العاشقى جەكپە-جەك قيىن بولعان جوق. ءبارى جاتتىقتىرۋشىم ايتقانداي بولدى. ەكى راۋندتا دا جەڭىپ شىقتىم. سودان كەيىن وسى سالماقتاعى الەم چەمپيونىنا ءتۇسىپ قالدىم. تاكتيكا بويىنشا قولمەن كوبىرەك ۇرىپ، سوسىن تەۋىپ، ۇپاي الۋىم كەرەك بولعان. ەكىنشى راۋندتا سولاي بولدى. ال ءۇشىنشى كەزەڭدە شارشاپ قالدىم، -دەدى نازىم ماحمۇتوۆا جەكپە-جەكتەن كەيىن.

وكىنىشكە قاراي، تاعى ءبىر وتانداسىمىز نۇرقانات قوجاحمەت العاشقى كەزەڭدە ءسۇرىندى. ۇلتتىق قۇراما سپورتشىسى (74 كگ) وڭتۇستىك كورەيا تاەكۆوندوشىسى جە ۆون كانعا جول بەردى. ەسەپ – 0:2. ايتا كەتەيىك، وسىعان دەيىن 2017 جانە 2019 جىلعى الەم چەمپيوناتىندا وسى سالماقتا قايرات سارىمساقوۆ قولا مەدال جەڭىپ العان.

ەرتەڭ — الەم چەمپيوناتىنىڭ سوڭعى كۇنى. قازاقستان ساپىنان ازيزا قاراجانوۆا (53 كگ) مەن رۋسلان جاپاروۆ (+87 كگ) باق سىنايدى.

شامكەن بايىربەك،

استانا