Taekvondodan ÁCh: Nazym Mahmutova jarys jolynan shyǵyp qaldy (FOTO)

Búgin Ázerbaıjannyń Baký qalasynda ótip jatqan taekvondodan XXVI álem chempıonatynyń altynshy jarys kúni boldy. Jarys jolyna ulttyq qurama sapynan Nazym Mahmutova (62 kg) men Nurqanat Qojahmetov (74 kg) shyqty, dep habarlady Mádenıet jáne sport mınıstrligi Sportty damytý dırekııasynyń baspasóz qyzmeti.

Osy chempıonattaǵy eń jas sportshynyń biri 16 jastaǵy Nazym Mahmutova japonııalyq Kasýmı Hırabaıashıdy eki raýndta utyp, álem chempıonatyn jaqsy bastady. Osydan keıin ol álemdik reıtıngide upaıy az bolǵandyqtan kósh basyndaǵy taekvondoshynyń birine qarsylas boldy. Byltyrǵy jastar men eresekter arasyndaǵy álem chempıony Sara Chaarımen aıqas tartysty ótti. Alǵashqy raýndta belgııalyq basym bolǵanymen, Nazym tarazy basyn teńestirip ketti. Alaıda sheshýshi raýndta tájirıbeli Sara Chaarı basymdyqty ýysynan shyǵarǵan joq.

Alǵashqy jekpe-jek qıyn bolǵan joq. Bári jattyqtyrýshym aıtqandaı boldy. Eki raýndta da jeńip shyqtym. Sodan keıin osy salmaqtaǵy álem chempıonyna túsip qaldym. Taktıka boıynsha qolmen kóbirek uryp, sosyn teýip, upaı alýym kerek bolǵan. Ekinshi raýndta solaı boldy. Al úshinshi kezeńde sharshap qaldym, -dedi Nazym Mahmutova jekpe-jekten keıin.

О́kinishke qaraı, taǵy bir otandasymyz Nurqanat Qojahmet alǵashqy kezeńde súrindi. Ulttyq qurama sportshysy (74 kg) Ońtústik Koreıa taekvondoshysy Je Von Kanǵa jol berdi. Esep – 0:2. Aıta keteıik, osyǵan deıin 2017 jáne 2019 jylǵy álem chempıonatynda osy salmaqta Qaırat Sarymsaqov qola medal jeńip alǵan.

Erteń — álem chempıonatynyń sońǵy kúni. Qazaqstan sapynan Azıza Qarajanova (53 kg) men Rýslan Japarov (+87 kg) baq synaıdy.

Shamken BAIYRBEK,

ASTANA