SportPress.kz Qazaqstan sport jańalyqtary
Belgili jýrnalıst, kásipker, byltyr AQSh-tyń Nıý-Iork qalasynda alǵash bolyp otandastarymyzdyń arasynda alty meıjor marafondy sub 3, ıaǵnı úsh saǵat ishinde júgirgen Erenǵaıyp Qýataıuly Portýgalııanyń Lıssabon qalasynda ótip jatqan Lisbon half marathon – 2024 marafonyna qatysyp jatyr.
Keshe ol marafonda júgirip, márege 1 saǵat 21 mınýt 53 sekýndtta jetti. Onyń aıtýynsha, nátıje jaman emes. Jalpy, Eýropada Lıssabonnan basqa taǵy bes jarty marafon bar. Olar — Praga, Berlın, Kardıff, Kopengagen jáne Valenııa.
Keshe alty jartyny bastadym. Nátıje jaman emes: 1:21:53.
Lisbon half marathon tolyq marafonnan kem bolǵan joq. Álemniń ár jerinen 37 500 adam qatysqan surapyl jarys boldy. Aıtpaqshy jarty marafonnyń álemdik rekordy osy Lıssabon jarty marafonynyń enshisinde. Eki jyl buryn ýgandalyq jelaıaq Kıplımo Djeıkob 57:31 nátıjesimen talaıdyń tańdaıyn qaqtyrǵan bolatyn.
Bıyl Lıssabonda kún ystyq boldy. Soǵan baılanysty bolǵan shyǵar, álem rekordy jańarmaq túgili, oǵan baqandaı 3 mınýt jetpeı qaldy. Qalaı bolǵanda da, uıymdastyrý deńgeıi meıjor marafonnan esh kem bolǵan joq. Tek pýblıkanyń aǵylshyndar sııaqty agressıvti qoldaýy jetispeı qalǵan sııaqty.
Sonymen Superhalfs-tyń alǵashqy medaly qaltada. Alda sáýirde Praga kútip tur, — dedi ol.
Erenǵaıyp Qýataıuly – joǵaryda atap ótkenimizdeı, alǵash bolyp otandastarymyzdyń arasynda alty meıjor marafondy sub 3, ıaǵnı úsh saǵat ishinde júgirgen azamat. Ol Boston, Chıkago, Nıý-Iork, Berlın, London, Tokıo marafondarynda, ıaǵnı, alty meıjordy júgirgen alty adamnyń biri.
Marafon tek dalaqtap júgirý emes, onyń da fılosofııalyq máni bar. Marafon — jiger. Marafon — tártip. Marafon — qaıyrymdylyq. Marafon — saıahat…, — deıdi Erenǵaıyp Qýataıuly.
Iá, shynymen de jeńil atletıka – sporttyń tóresi. Ol — fılosofııa, ol – densaýlyq kepili. Sol sebepten jelaıaq jýrnalıst halyqty belgili jeńilatlet Mıhaıl Krasılovtyń Young runner klýbyna múshe bolyp marafonǵa daıyndalýǵa shaqyratynyn taǵy da aıtty.
Dastan KENJALIN,
ASTANA
