SportPress.kz Qazaqstan sport jańalyqtary
Semeı qalasyndaǵy «Abaı Arena» sport kesheni tórt kún boıy elimizdiń túkpir-túkpirinen kelgen apaıtós balýandardyń aıqasyna kýá boldy, dep habarlady Qazaq Kuresi Assoıaııasynyń baspasóz qyzmeti.
Qazaq kúresinen eresekter arasyndaǵy Qazaqstan kýbogy – bıylǵy ulttyq sport kúntizbesindegi eń tartysty jarystardyń biri boldy. Alash arystarynyń izi qalǵan, hakim Abaıdyń qany tamǵan qasıetti topyraqta ulttyq kúresimizdiń týy qaıta jelbiredi.
Bul dodaǵa elimizdiń barlyq óńirinen kelgen 20 komanda qatysyp, erler men áıelder 16 salmaq dárejesi boıynsha bozkilemge shyqty. Sonymen qatar, tórtinshi kúni ótken aralas komandalyq jarys naǵyz tartystyń shyńyna aınalǵany sózsiz.
Birinshi jarys kúni bastalǵan beldesýlerden-aq bul jolǵy kýboktyń deńgeıi aıqyn baıqalyp, jarys bozkilemdegi naǵyz sheberlerdiń saıysyna aınaldy. Ár salmaq dárejesinde tartys pen taktıka, jiger men tártip qatar órbidi.
Erler arasyndaǵy kúrester eń jeńil salmaq – 55 keliden bastaldy. Munda Abaı oblysynyń úmiti Qýanysh Maqsutov kilemde kezdesken qarsylastarynan basym túsip, týǵan topyraǵynda top jardy.
60 kelide Jetisý oblysynyń namysyn qorǵaǵan tájirıbeli balýan Marat Nıgmatýllaev shıraq ári salmaqty óner kórsetip, óz salmaǵynyń úzdigi atandy. Al 66 kelide bozkilemge shyqqan shymkenttik balýan Ibrahım Nurmahanuly qarsylastaryn senimdi kúresimen jeńdi.
74 kelide Jambyl oblysynyń ókili Orynbasar Baqtybekuly utymdy ádis pen tabandylyq tanytyp, altyn medaldi jeńip aldy.
82 kelide synǵa túsken aqtóbelik sportshy Azat Qýanovtyń sheberligimen tanyla bilip, jeńis tuǵyrynan kórindi. Al 90 kelide Abaı oblysynyń namysyn qorǵaǵan Qýanysh Rátaev kúres kórkin qyzdyryp, jankúıerlerin erekshe qýantty. Onyń jeńisi – tek jeke jetistik emes, óńirlik kúres mektebiniń abyroıy desek artyq bolmas.
100 kelide atoı salyp, úzdik atanǵan – Shymkent qalasynyń taǵy bir sańlaǵy Ersultan Muzapparov. Sóıtip, ol jyl basynda Úndistan elinde ótken álem chempıonatyndaǵy jeńisti jolyn jalǵastyrdy. Alyptardyń beldesýinde, ıaǵnı +100 keli salmaq dárejesinde Túrkistan oblysynyń balýany Qaısar Shamshıdınov kilemdegi kúsh pen taktıkany tamasha úılestirip, jeńiske jetti. Al túıe balýan synynda mańǵystaýlyq balýan Nurdáýlet Jarylǵapov ózgelerden oq boıy ozyp, óz salmaǵynyń has sheberi ekenin taǵy bir dáleldedi.
Názik jandar arasyndaǵy beldesýler de asa tartysty ótti. Atap aıtqanda, 48 kelide bozkilemge shyqqan Mańǵystaý oblysynyń burymdy balýany Aıdana Hasenqyzy kilemdegi qarsylastaryn qapy qaldyrdy. 52 kelide Almaty oblysynyń ókili Araı Dúısebaı taza tehnıkalyq basymdyqpen jeńiske jetti. О́z óńiriniń namysyn qoldan bermegen shymkenttik Ásemgúl Baltabaı 56 kelide jeńistiń bıik tuǵyrynan kórine bildi. Sondaı-aq, 60 kelide synǵa túsken QKSK ókili Nazerke Asanhan, 65 kelide taǵy bir shymkenttik Sabına Álibek naǵyz sportshyǵa tán tabandylyqtyń arqasynda kýboktyń ıegeri atandy.
70 kelide Ulytaý oblysynan kelgen Aqerke Myrzabek, 77 kelide Atyraý oblysynyń maqtanyshy Arýjan Jandarbaı, +77 kelide Abaı oblysynyń úmiti Zere Bektasqyzy qarsylas shaq keltirmeı, bozkilemde ózindik mektep pen sheberliktiń úlgisin kórsetti.
«Samuryq Qazyna» ulttyq ál-aýqat qory» AQ jáne Sport Qory sportty qoldaý qory demeýshilik kórsetken doda barysynda ár salmaqta top jarǵan bul sportshylar – óz óńirleriniń abyroıyn kóterip qana qoımaı, qazaq kúresiniń búgingi bıik deńgeıin pash etken dara tulǵalar.
Komandalyq aıqas – birliktiń aınasy
Tórt kúnge sozylǵan tartysty jarystyń eń qyzý kezeńi – aralas komandalyq beldesý boldy. Bul kúni bozkilemge shyqqan ár óńirdiń namysyn arqalaǵan balýandar úshin tek jekeleı emes, ujymdyq jaýapkershilik te aldyńǵy qatarǵa shyqty. Erler – 66, 82, 100 jáne +100 kelide, al áıelder – 60, 70 jáne +77 keli salmaq dárejelerinde synǵa tústi.
Komandalyq jarystyń nátıjesi tek sheberliktiń emes, komandalyq rýhtyń, óńirlik sport mektepteriniń júıeli eńbeginiń kórsetkishi boldy. Bul turǵyda Shymkent qalasynyń quramasy barlyq kórsetkish boıynsha ózgelerden oza shaýyp, Qazaqstan kýbogynyń eń úzdik komandasy atandy. Olardyń jeńisin tek fızıkalyq daıyndyqpen emes, birlik pen taktıkalyq úılesimdilikpen kelgen nátıje deýge bolady.
Abaı oblysy quramasy da qarsylastarynan qalys qalmaı, kúmis júldege ıe boldy. Erler men áıelder quramynyń birdeı belsendiligi men sátti taktıkasy bul jetistikke jol ashty. Al Astana men Almaty qalalary komandalyq jarysta qola júldeni bólisti. Bul eki iri megapolıstiń de ulttyq sportqa degen kózqarasy men qoldaýy aıqyn kórinis tapty.
Komandalyq jarys – tek balýan men beldesý emes, bul – senim men serttiń, daıyndyq pen ózara qoldaýdyń nátıjesi. Bıylǵy Kýbok kórsetken basty sabaq – birlik bar jerde jeńis bar.
Medaldar esebi: kim kósh bastady?
Qazaqstan kýbogynyń qorytyndysy – bul tek tórtkúndik beldesýdiń nátıjesi emes, bul – óńirlik sporttyń, bapkerler eńbeginiń jáne sportshylardyń zalda tókken teriniń nátıjesi. Bıylǵy jarysta barlyǵy 16 jekeleı salmaq dárejesi men 1 komandalyq saıys boıynsha jeńimpazdar anyqtaldy.
Medaldar esebine kóz salsaq, Shymkent qalasynyń balýandary naǵyz kóshbasshylyq tanytty. Quramanyń qorjynynda 6 altyn, 2 kúmis jáne 7 qola medal bar. Bul – tek sany emes, sapasy jaǵynan da úzdik kórsetkish. Shymkent balýandary jekeleı jarystarda da, komandalyq básekede de ózderin moıyndata bildi.
Qorjynynda 3 altyn, 3 kúmis jáne 4 qola medali bar Abaı oblysy ekinshi orynǵa jaıǵassa, al Mańǵystaý oblysy 2 altyn, 1 kúmis jáne 1 qola kórsetkishimen úzdik úshtikti túıindedi.
Uly Abaıdyń 180 jyldyǵy aıasynda Abaı oblysynyń ortalyǵy – Semeı qalasynda ótken bul jarys – jaı ǵana qatardaǵy doda emes, ol ulttyq ıdeologııanyń, sport pen tárbıeniń toǵysqan alańy. Qazaq kúresi búginde tek el ishindegi emes, halyqaralyq arenada da moıyndalǵan sport túri. Bul – onyń Dúnıejúzilik kóshpendiler oıyndary men World Combat Games sııaqty keshendi oıyndardyń baǵdarlamalaryna enýimen dáleldenip otyr.
Osy baǵytta júıeli jumys istep kele jatqan Qazaq Kuresi Assoıaııasy jyl saıyn 90-nan astam respýblıkalyq, ulttyq jáne halyqaralyq jarystar ótkizip, ulttyq murany óskeleń urpaqtyń boıyna sińirip jatyr.
