Рыбакина әлемнің 6-ракеткасын жеңіп, ширек финалға шықты

Қазақстанның бірінші, әлемнің 10-ракеткасы Елена Рыбакина АҚШ-тың Цинциннати қаласында өтіп жатқан WTA 1 000 турнирінің ширек финалына шықты, деп хабарлады Қазақстан теннис федерациясы. 

Рыбакина төртінші айналымда әлемнің 6-ракеткасы, америкалық Мэдисон Кизбен ойнап, жеңіске жетті.

Қарсыластар осыған дейін бір-бірімен бес рет ойнап, америкалық теннисші соның үшеуінде жеңген еді. Бұл жолы бірінші партияда тай-брейкте Киз сәтті ойнады. Бірінші партияда есеп 7:6 (7:3) болды.

Екінші партияда Рыбакина 6:4 есебімен есе қайырды. Үшінші, шешуші сетте Рыбакина тағы да үстемдік танытты. Партия 6:2 болып бітті.

Екі сағат 25 минутқа созылған тартысты ойында Рыбакина 6 эйспен бірге 14 брейк-пойнттың алтауын пайдаланды. Енді ол жартылай финалға шығу үшін әлемнің 1-ракеткасы, Беларусь өкілі Арина Соболенкомен ойнайды.