اتىراۋ ۋنيۆەرسيتەتىنىڭ ستۋدەنتى قول كۇرەسىنەن الەم چەمپيونى اتاندى

حالەل دوسمۇحامەدوۆ اتىنداعى اتىراۋ ۋنيۆەرسيتەتىنىڭ 2-كۋرس ستۋدەنتى نۇرىم امانوۆ پارا-ارمرەستلينگتەن ەرەسەكتەر اراسىنداعى سايىستا (+80 كگ) وڭ قول كۇرەسىنەن الەم چەمپيونى اتاندى.

سونداي-اق، اتالعان سايىستا ۋنيۆەرسيتەتتىڭ دەنە شىنىقتىرۋ جانە سپورت ماماندىعىنىڭ ستۋدەنتى بەكزات راحىمجانوۆ (+65 كگ) وڭ قول كۇرەسىنەن ەكىنشى ورىندى جەڭىپ الدى.

عىلىم جانە جوعارى ءبىلىم مينيسترلىگىنىڭ حابارلاۋىنشا،سپورتشىلار الماتىدا وتكەن ارمرەستلينگتەن جانە پارا-ارمرەستلينگتەن الەم چەمپيوناتىنا قاتىسقان. وندا الەمنىڭ 52 مەملەكەتىنەن 1200 سپورتشى باق سىناعان. چەمپيوناتتا قازاقستان اتىنان 256 سپورتشى ەل نامىسىن قورعادى.

جەڭىمپاز ستۋدەنتتەر اتىراۋ وبلىسىنداعى «مۇگەدەكتەردىڭ سپورتتىق كلۋبىندا» جاتتىعادى. سپورتشىلاردى وڭىرگە بەلگىلى سپورت شەبەرلەرى ر.قۇرمان، ك.تارابرين جانە ي.تەلەۋگاليەۆتار جارىسقا دايىنداعان.

داستان كەنجالين،

استانا