تاريحي ءسات! ريزابەك ايتمۇحان – ەركىن كۇرەستەن الەم چەمپيونى اتانعان تۇڭعىش قازاق پالۋانى! (فوتو، ۆيدەو)

ساناۋلى ءسات بۇرىن ەركىن كۇرەستەن ۇلتتىق قۇراما كوماندانىڭ سپورتشىسى ريزابەك ايتمۇحان سەربيانىڭ استاناسى — بەلگرادتا ءوتىپ جاتقان كۇرەستەن الەم چەمپيوناتىندا توپ جاردى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ەركىن كۇرەستەن 92 كگ دەيىنگى سالماقتىڭ فينالىندا ريزابەك əزەربايجاندىق وسمان نۋرماگومەدوۆپەن كۇش سىناسىپ، سوڭعى سەكۋندتاردا جەڭىسكە جەتتى. ەسەپ — 5:2.

وسىلايشا، ول ەلىمىز ەگەمەندىك العاننان بەرى الەم چەمپيوناتىندا ەركىن كۇرەستەن التىن مەدال العان تۇڭعىش ءارى ەڭ جاس قازاقستاندىق پالۋان اتاندى. وسى ۋاقىتقا دەيىن ۇلتتىق قۇراما 17 جۇلدەنى يەلەنگەن. ونىڭ بەسەۋى كۇمىس، 12-ءسى قولا مەدال.

قۇتتىقتاپ جاتقان قازاق ەلىنە راقمەت! الەم چەمپيونى اتانۋ ءۇشىن 9 جىل ەڭبەك ەتتىم. ەڭبەگىم اقتالدى. بۇل مەنىڭ 92 كەلى سالماقتاعى سوڭعى جارىسىمنىڭ ءبىرى. كەلەسى باسەكەدەن باستاپ وليمپيادا باعدارلاماسىنا كىرەتىن 97 كگ دەيىنگى سالماققا اۋىسامىن. ەندىگى ماقساتىم – وليمپيالىق ويىنداردا مەدال الۋ ،-دەدى 19 جاستاعى اتلەت فينالدان كەيىن سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

ايتا كەتەيىك، كەشە ريزابەك باسەكەنى ەكىنشى اينالىمنان باستاپ، ماجارستاندىق بالاش يۋحاش پەن تۇركيالىق فەيزۋللا اقتۇرىكتى تازا ۇتقان. سوسىن، وسى سالماقتاعى قازىرگى الەمدىك رەيتينگتىڭ كوشباسشىسى گرۋزيالىق ميرياني مايسۋرازدەنى قاپى قالدىردى.

ريزابەك ايتمۇحان بيىل ءوزى قاتىسقان بارلىق جارىستا جەڭىس تۇعىرىنا كوتەرىلدى. اتاپ ايتار بولساق، جىلدىڭ باسىندا الماتىدا وتكەن كۇرەستەن قازاقستاننىڭ VI جازعى سپارتاكياداسىندا ەشكىمگە دەس بەرمەي، ۇلتتىق قۇراما ساپىن تولىقتىردى. وسىدان كەيىن كوكتەمدە استانادا وتكەن ەرەسەكتەر اراسىنداعى ازيا چەمپيوناتىندا، سونداي-اق، اممان قالاسىندا وتكەن جاستار اراسىنداعى الەم چەمپيوناتىندا كۇمىس مەدال جەڭىپ الدى.

بۇگىن كۇللى ەلىمىز ءۇشىن قۋانىشتى كۇن. ريزابەك قازاقستانعا وسىعان دەيىن ەركىن كۇرەستەن بۇيىرماي كەلە جاتقان الەم چەمپيوناتىنىڭ التىن مەدالىن جەڭىپ الدى. ريزابەك وسى ارقىلى ءبىزدىڭ بارلىق جانكۇيەردى ريزا قىلدى. سەنىڭ الار اسۋلارىڭ ءالى الدا دەگەن سەنىمدەمىن، — دەدى قازاقستان گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى داۋلەت تۇرلىحانوۆ.

قازىر ماديار قۇرامىسوۆ جاتتىقتىراتىن ەركىن كۇرەستەن قازاقستان قۇراماسىنىڭ قورجىنىندا بەلگرادتاعى باسەكەنىڭ ەكى جۇلدەسى بار.

كەشە ازامات داۋلەتبەكوۆ (86 كگ) قولا مەدالمەن بىرگە پاريج وليمپياداسىنىڭ جولداماسىنا يەلىك ەتكەن. بۇگىن قولا مەدال جولىندا ازامات قارتباي (57 كگ) مەن بولات ساقاەۆ (79 كگ) قارسىلاسىنا ەسە جىبەردى. ايتا كەتەيىك، 92 كگ دەيىنگى سالماق وليمپيادا باعدارلاماسىنا كىرمەيدى.

 

شامكەن بايىربەك،

استانا

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسى

 

 

View this post on Instagram

 

A post shared by House of olympic sports of Kazakhstan (@qaz_olympics)

 

View this post on Instagram

 

A post shared by SPORTS.KZ (@kzsports)

 

View this post on Instagram

 

A post shared by SPORTS.KZ (@kzsports)