ءامين تۇياقوۆ

سوناۋ 1960 جىلدارى جۇگىرۋدەن الدىنا جان سالماعان داڭقتى سپورتشىمىز ءامين تۇياقوۆ 80 جاسقا تولدى. الەمدىك رەكوردتاردى سان مارتە اۋىزدىقتاعان ارداگەر سپورتشى بۇل كۇندەرى بەينەتتىڭ زەينەتىن كورىپ وتىرعان جايى بار.

اقمىشتا تۋىپ، اقش-تا وزعان ءامين تۇياقوۆتىڭ ەسىمى ەل سپورتىنىڭ تاريحىندا ماڭگى ساقتالارى ءسوزسىز. شاشاسىنا شاڭ جۇقپاعان جەلاياق 60-جىلدارى كۇللى الەمدى اۋزىنا قاراتتى. 100 جانە 200 مەترلىك قاشىقتىقتا كسرو-نىڭ بىرنەشە دۇركىن چەمپيونى اتانعان اعامىز، «عاسىر بايگەسى» اتانعان امەريكا مەن كسرو سپورتشىلارىنىڭ جارىسىندا دا ءتورت اياعىن توسكە ۇرعان تۇلپارداي وزا شاپتى.

ءامين تۇياقوۆ، داڭقتى سپورتشى:

— ەگەر دە مەن بوريس سەرگەەۆيچ توكارەۆتىڭ قولىنا تۇسپەسەم، وندا باسقاشا بولۋى مۇمكىن ەدى. سپورتشىنىڭ ۇلكەن ناتيجەلەرگە جەتۋى تەك قانا وزىنە بايلانىستى ەكىنشىدەن باپكەرىنە دە بايلانىستى.

سپورتشى بولۋ وڭاي باپكەر بولۋ قيىن دەپ تۇسىنەتىن ءامين تۇياقوۆ تا ءبىر كەزدەرى ۇلتتىق قۇراما تىزگىنىن ۇستاپ تالاي تۇلپارلاردى تاي كۇنىندە تانىپ توپقا قوسا ءبىلدى. سولاردىڭ ءبىرى – ولگا شيشيگينا. تەك قوسانوۆ پەن ءوزىنىڭ ءىزىن باسار قارا كوزدەردى شىعارا الماعانىنا قىنجىلادى دەمەسەڭىز، ءامين اعا تالاي بۇلاقتىڭ كوزىن اشتى.

الما دوسىمباەۆا، زايىبى:

— اعاڭ سپورتتا جۇرگەندە سپورتقا دۇرىس كوڭىل بولىنگەن جوق. ول كەزدە ەشقانداي اۋرۋىنا دا قاراعان جوق. قازىرگى سپورتشالىر باقىتتى عوي. قازىرگى كەزدە اياعىن جەرگە تيگىزبەي كوتەرىپ الىپ كەتەدى. ال بۇل كىسى اۋىلعا بارارعا ماشينا تابا الماي، ساموسۆالمەن بارعان توكيو وليمپياداسىنان كەيىن.

جارى المامەن 50 جىل وتاسقان ءامين اعامىز ۇلى مەن قىزىنان بىرنەشە نەمەرە ءسۇيىپ وتىر. سانالى عۇمىرىن سپورتقا سارپ ەتكەن ساڭلاق سپورتشىنىڭ ءالى دە ارمانى كوپ.

ءامين تۇياقوۆ، داڭقتى سپورتشى:

— ارمان كوپ. ەندى مەن سپورتتىڭ ارقاسىندا ادام بولعاننان كەيىن ارينە ايتاسىڭ، كەلەشەكتە ءبىزدىڭ ءىزىمىزدى باسار وليمپيادالىق ويىنداردى كورسەتەتىن جىگىتتەر كوپ بولسا ەكەن دەپ. ال جەكە ءوزىمنىڭ قارا باسىما كەلەتىن بولسام. بالالارىم جۇمىس جاساپ جاتىر. سولار امان بولىپ، نەمەرەلەرىم امان بولىپ، وسىلاردىڭ ومىردەگى بولىپ جاتقان تىرشىلىكتەرىنە قاتىناسىپ، ءبىزدىڭ قوعامعا ءبىر ىشىنە كىرىسىپ، جۇمىس جاساسا ەكەن دەپ ويلايمىن.

زامانىندا اۋزىمەن قۇس تىستەگەن اعامىز اقپاندا 80-ءنىڭ سەڭگىرىنە شىقتى. مەرەيتوي يەسىنە تىلەرىمىز كوپ. «حابار24».