استانا اكىمى ءجاميلا باقبەرگەنوۆاعا پاتەر كىلتىن تاپسىردى

استانا قالاسىنىڭ اكىمى جەڭىس قاسىمبەك XIX جازعى ازيا ويىندارىنىڭ چەمپيوندارىمەن كەزدەسىپ، سىيلىق تارتۋ ەتتى.

جاقىندا قىتايدىڭ حانچجوۋ قالاسىندا وتكەن ازيادادا قازاقستان ۇلتتىق قۇراما كومانداسىنىڭ ساپىنداعى استانانىڭ سپورتشىلارى 10 مەدال جەڭىپ الدى. ولار ەل قورجىنىنا 1 التىن، 3 كۇمىس جانە 6 قولا جۇلدە سالدى. وسىعان بايلانىستى استانا قالاسىنىڭ اكىمى ازيادانىڭ قۇرمەت تۇعىرىنان كورىنگەن سپورتشىلارمەن كەزدەسىپ، جەكە قۇتتىقتادى. وسى جەردە قالا باسشىسى ازيا ويىندارىندا ايەلدەر كۇرەسىنەن كۇمىس جۇلدەگەر اتانعان ءجاميلا باقبەرگەنوۆاعا 1 ملن تەڭگە ءنىڭ سەرتيفيكاتى مەن استانادان ءبىر بولمەلى پاتەر كىلتىن تابىس ەتتى.

سپورتشىلارىمىز قايسارلىعىنىڭ، تاباندىلىعىنىڭ ارقاسىندا جاقسى ناتيجە كورسەتتى. ءاربىر مەدال توقتاۋسىز جاتتىعۋلار، جەڭىسكە دەگەن جىگەردىڭ، وتباسىنىڭ، جانكۇيەرلەر مەن جاتتىقتىرۋشىلاردىڭ قولداۋىنىڭ ارقاسىندا كەلدى.

سىزدەر – ەلوردامىزدىڭ عانا ەمەس، بۇكىل ەلىمىزدىڭ ماقتانىشىسىزدار. جەڭىستەرىڭىزبەن شىن جۇرەكتەن قۇتتىقتايمىن! سىزدەردى الدا ءالى تالاي جارىس كۇتىپ تۇر. ەڭ باستىسى پاريجدە وتەتىن وليمپيادا بار. ءبىز سپورت كوماندالارىمىزدىڭ باسەكەگە قابىلەتىن ارتتىرۋ ءۇشىن كەشەندى جۇمىس جۇرگىزۋىمىز كەرەك، — دەدى قاسىمبەك.

سونىمەن قاتار كەزدەسۋدە سپورت نىساندارىن دايىنداۋ، جابدىقتاۋ، سپورتشىلار مەن جاتتىقتىرۋشىلاردى ىنتالاندىرۋ ماسەلەلەرى تالقىلاندى.

داستان كەنجالين،

استانا

فوتو: استانا قالاسىنىڭ اكىمدىگى