تەننيستەن جاسوسپىرىمدەر قۇراماسى ۇزدىك وندىققا كىردى

قازاقستاننىڭ 16 جاسقا دەيىنگى تەننيسشىلەر اراسىنداعى قىزدار قۇراماسى يسپانيانىڭ كوردوۆا قالاسىندا وتكەن Billie Jean King Juniors Finals ءتۋرنيرىنىڭ قورىتىندىسى بويىنشا ۇزدىك وندىققا كىردى، دەپ حابارلادى قازاقستان تەننيس فەدەراتسياسى.

بۇل 16 جاسقا دەيىنگىلەر اراسىنداعى قىزدار ءۇشىن العاشقى كوماندالىق الەم چەمپيوناتى بولدى.

قۇراما كوماندا الدىمەن ۆ توبىندا ءۇشىنشى ورىنعا يە بولدى. قۇراما ءبىرىنشى ويىندا ارگەنتينا كومانداسىن 2:1 ەسەبىمەن جەڭگەنىمەن، برازيليا مەن ۇلىبريتانياعا جول بەردى.

قوسىمشا جارىستا قازاقستان قۇراماسى الجير جاساعىن 3:0 ەسەبىمەن جەڭىپ، كولۋمبيا مەن لاتۆيادان دا 2:1 ەسەبىمەن باسىم ءتۇستى.

وسىلايشا، مارات ءشارىپوۆتىڭ قاراماعىندا جاتتىعاتىن تەننيىسشىلەر الەمنىڭ ۇزدىك 16 كومانداسىنىڭ اراسىنان توعىزىنشى ورىنعا تابان تىرەدى.

الەم چەمپيوناتىندا ەل نامىسىن پولينا سلەپتسوۆا، اناستاسيا كرىمكوۆا مەن ىڭكار دۇيسەباي قورعادى. ال مارات ءشارىپوۆ جارىسقا كوماندا كاپيتانى بولىپ باردى.