Birikken kúres odaǵynyń reıtınginde qazaq balýandary kósh bastady

Erkin kúresten qazaqtan shyqqan tuńǵysh álem chempıony Rızabek Aıtmuhan men álem chempıonatynyń úsh dúrkin júldegeri Jámıla Baqbergenova Birikken álemdik kúres odaǵynyń (United World Wrestling – UWW) reıtınginde kósh bastady.

Rızabek Aıtmuhan 92 keli salmaqta birinshi orynǵa shyqsa, Jámıla Baqbergenova 72 kelige deıingi salmaqta úzdik atandy. Jámıla da erkin kúresten álem chempıonatynda úsh ret medalıst bolǵan tuńǵysh qazaq qyzy. Al Rızabek byltyr tuńǵshy ret qazaq tarıhynda álem chempıony atanǵan bolatyn.

Jámıla Baqbergenova Azııa chempıonatyn úsh ret jeńip alǵan.  Byltyr ol Qytaıda ótken Azııa oıyndarynyń kúmis júldegeri atandy.

Sportshylarǵa Birikken álemdik kúres odaǵynyń reıtınginde baǵa olardyń álem chempıonattaryna, qurlyqtyq týrnırlerge, Azııa oıyndaryna, Panamerıkandyq oıyndar men tórt reıtıngtiń týrnırge qatysyp, jeńip alǵan júldelerine qarap beriledi.

Dastan KENJALIN,

ASTANA