بوكستان ۇلتتىق قۇراما ليتسەنزيالىق تۋرنيرگە دايىندالىپ جاتىر (فوتو)

ەلىمىزدىڭ بوكستان ەرلەر قۇراما كومانداسى شىمكەنت قالاسىندا يتاليانىڭ بۋستو-ارسيتسيو قالاسىندا وتەتىن الەمدىك ليتسەنزيالىق تۋرنيرگە دايىندالىپ جاتىر، دەپ حابارلادى قازاقستان بوكس فەدەراتسياسى.

وقۋ-جاتتىعۋ جيىنىنا 80-گە جۋىق بوكسشى قاتىسۋدا. ولاردىڭ اراسىندا ليتسەنزيالىق تۋرنيرگە قاتىساتىن التى بوكسشىدان باسقا، ۇلتتىق قۇرامانىڭ وزگە دە مۇشەلەرى مەن ءار وبلىستىڭ قۇرامالارى بار.

جىگىتتەردىڭ دايىندىعى جاقسى. ءبىز ليتسەنزيالىق تۋرنير الدىندا بوكسشىلاردىڭ تاكتيكالىق جانە تەحنيكالىق دايىندىعىنا ەكپىن قويىپ جاتىرمىز. قازاقستان بوكس فەدەراتسياسى تاراپىنان بارلىق جاعداي جاسالعان. ەندى 29 اقپاندا يتالياعا جول جۇرەمىز، — دەدى ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ.

اپەننين تۇبەگىندەگى تۋرنيرگە 51 كەلىدە ساكەن بيبوسىنوۆ، 57 كگ سالماقتا سابىرحان ماحمۇد، 63،5 كەلىدە مۇحامەدسابىر بازارباي ۇلى، 71 كگ سالماقتا اسلانبەك شىمبەرگەنوۆ، 80 كەلىدە نۇربەك ورالباي مەن 92 كەلىدە ايبەك ورالباي قاتىسادى.

يتالياداعى تۋرنيرگە قاتىسپايتىن بوكسشىلارىمىز سەربيا، ليتۆا، ازەربايجان ەلدەرىندەگى حالىقارالىق تۋرنيرلەردە شارشى الاڭعا شىعادى. سونداي-اق، وقۋ-جاتتىعۋ جيىنىنان كەيىن بوكسشىلاردىڭ بىرقاتارى اتىراۋدا وتەتىن بولات تەمىروۆتى ەسكە الۋعا ارنالعان حالىقارالىق تۋرنيردە قولعاپ تۇيىستىرەدى. ال يتاليانىڭ بۋستو-ارسيتسيو قالاسىندا وتەتىن الەمدىك ليتسەنزيالىق تۋرنيردە ەرلەر اراسىندا 28 ليتسەنزيا ساراپقا سالىنادى.

قازىرگى تاڭدا قازاقستان ەرلەر قۇراماسى پاريج وليمپياداسىنىڭ ءبىر ليتسەزياسىن يەلەنگەن. جولدامانى جازعى ازيا ويىندارىندا اسا اۋىر سالماقتاعى قامشىبەك قوڭقاباەۆ جەڭىپ العان ەدى.