بوكستان ساعادات نۇرماعامبەتوۆتىڭ ءجۇز جىلدىعىنا ارنالعان تۋرنير باستالدى (فوتو)

قورعانىس مينيسترلىگى سپورت كوميتەتى – ورتالىق سپورت كلۋبىنىڭ بازاسىندا كەڭەس وداعىنىڭ باتىرى، № 1 حالىق قاھارمانى قازاقستاننىڭ تۇڭعىش قورعانىس ءمينيسترى، ارميا گەنەرالى ساعادات نۇرماعامبەتوۆتى ەسكە الۋعا ارنالعان بوكستان حالىقارالىق تۋرنير باستالدى، دەپ حابارلادى قورعانىس مينيسترلىگى.

تۋرنير باستالار الدىندا ونىڭ ۇيىمداستىرۋشىلارى، سپورتشىلار مەن كۋرسانتتار ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىنداعى داڭقتى باتىردىڭ ەسكەرتكىشىنە گۇل شوقتارىن قويدى.

ءتۋرنيردىڭ سالتاناتتى تۇردە اشىلۋ راسىمىنە قورعانىس مينيسترلىگى سپورت كوميتەتىنىڭ توراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ، كسرو-نىڭ ەكى دۇركىن چەمپيونى، ەۋروپا چەمپيونى كارىمجان ءابدىراحمانوۆ پەن باتىردىڭ قىزى ايسۇلۋ نۇرماعامبەتوۆا قاتىستى.

اتاقتى باتىردىڭ قۇرمەتىنە ارنالعان ءداستۇرلى تۋرنير بيىل 27-رەت وتكىزىلىپ وتىر. ساعادات قوجاحمەت ۇلى ەلىمىز قارۋلى كۇشتەرىنىڭ باستاۋىندا تۇرعان تۇلعا. ول ءوز ءومىرىن تۋعان وتانىنا قىزمەت ەتۋگە ارنادى. ءبىز ءۇشىن ول قاھارماندىقتىڭ، جانقيارلىق پەن اسكەري بورىشقا ادالدىقتىڭ ۇلگىسى، – دەدى پولكوۆنيك ارمان ابەۋوۆ.

ايتا كەتەيىك، جارىسقا قازاقستان، ارمەنيا، ازەربايجان، قىرعىزستان، تاجىكستان، تۇركىمەنستان جانە وزبەكستاننان كەلگەن 21 كوماندانىڭ قۇرامىنداعى 150-گە جۋىق سپورتشى قاتىسادى.

بۇل كۇندەرى بولىپ جاتقان ءىس-شارالاردىڭ ءبارىن مايداندا قان توككەن ارداگەرلەر مەن جەڭىستى جاقىنداتۋ جولىندا تىلدا تەر توككەن جانداردىڭ بارلىعىنا قۇرمەت دەپ بىلەمىن. اكەم ءوز ەلىنىڭ ناعىز پاتريوتى بولدى. ول ءۇشىن وتانعا پايداسىن تيگىزۋ ۇلكەن باقىت بولاتىن. جاس تاۋەلسىز مەملەكەتتى قورعاۋعا قابىلەتتى قازاقستان اسكەرىن قۇرۋعا ول اسا ۇلكەن جاۋاپكەرشىلىكپەن كەلدى، – دەدى باتىردىڭ قىزى ايسۇلۋ ساعاداتقىزى.

ول ءوزىنىڭ وتباسىنىڭ اتىنان اكەسىنىڭ قۇرمەتى مەن اعا بۋىننىڭ ەرلىگىن ۇلىقتاۋ ءۇشىن جاسالىپ جاتقان ءىس-شارالارعا ريزاشىلىعىن ءبىلدىردى.

بىلعارى قولعاپ شەبەرلەرىنىڭ ءتۋرنيرى ءتورت كۇنگە سوزىلىپ، 25 مامىردا اياقتالادى.