لاس-ۆەگاستا گولوۆكين مەن الۆارەس جانكۇيەرلەرمەن جۇزدەستى

ارمىسىزدار، سپورت جانكۇيەرلەرى!

بوكستى جاقسى كورەتىن قىز-جىگىتتەرىمىز، گولوۆكين مەن الۆارەستىڭ جەكپە-جەگى قاشان وتەدى، قاشان بىتەدى دەپ تاعاتسىزدانا كۇتىپ جۇرگەندەرىڭىزدى بىلەمىن. ارينە، جۇرەكتەرىڭىز لۇپىلدەپ، ءبىزدىڭ جىگىت نە بولار ەكەن دەپ، جاندارىڭىزدى شۇبەرەككە ءتۇيىپ جۇرگەندەرىڭىزدى سوناۋ مۇحيتتىڭ ارجاعىندا جۇرگەن مەن جاقسى سەزىپ تۇرمىن. بۇل ەلگە، جەرگە، تۋعان جەردىڭ ازاماتىنا دەگەن قۇرمەتتەرىڭىزدىڭ بەلگىسى. ءسال شىداساق، قوس مىقتىنىڭ اراسىنداعى الاپات ايقاستى دا كورىپ قالامىز. سول شايقاستى ءوز كوزىممەن كورۋگە، سىزدەرگە جاقسى حابار تاراتۋعا مەن دە اقش-قا اتتانعان بولاتىنمىن. اللا ءساتىن سالسا، ءسۇيىنشى حاباردى جەتكىزۋگە مەن دە اسىقپىن. ەندى 15 قىركۇيەكتە وتەتىن عاسىر جەكپە-جەگىنىڭ الدىنداعى شارا جايلى تاعى ءبىر بايانداپ وتەيىن. بوكس الدىنداعى ەڭ نەگىزگى شارانىڭ ۇلكەنى بۇگىن ءوتتى. ولاي بولسا، وسى حابارىمدى تەزدەتىپ، وزدەرىڭىزبەن قاۋىشتىرۋعا بەل بۋدىم.

امەريكانىڭ لاس-ۆەگاس شتاتىندا «مGM گراند» ويىن-ساۋىق كەشەنىندە گەننادي مەن الۆارەستىڭ اراسىنداعى بوكستىڭ الدىنداعى ۇلكەن وقيعا بولىپ ءوتتى. بۇل كۇنى گەننادي گولوۆكين مەن ساۋل الۆارەس جۇرتشىلىقپەن جۇزدەستى. مۇنداي كەزدەسۋ الەمدىك كاسىپقوي بوكستىڭ نەگىزگى شارالارىنىڭ ءبىرى بولىپ سانالادى. سايىسقا شىعاتىن قوس مىقتىنى الاۋلاتىپ، جالاۋلاتىپ، جۇرتشىلىقپەن جۇزدەستىرەدى. مىنە، سول سالتاناتتى شارا بۇرىنعىدان دا وزگەشە بولدى. ءبىز تۇرعان «مGM گراند» ويىن-ساۋىق كەشەنىنىڭ ءىشى، سىرتى حالىققا تولىپ كەتتى. ءتىپتى، ءۇش ساعات ۋاقىت بۇرىن كەلىپ العاندار قانشاما. بارلىعىنىڭ قولدارىندا سۇيىكتى بوكسشىلارىنىڭ سۋرەتتەرى، ۇستىلەرىنە كيگەن كيىمدەرىنە بەينەلەرىن باسىپ العانداردىڭ دا قاراسى كوپ. سولاردىڭ اراسىندا ءبىزدىڭ گەنانىڭ بەلگىسى بەلگىلەنگەن «GGG» باس كيىم كيگەندەر جەتىپ ارتىلادى. مۇنى كورگەن ءبىزدىڭ ءىشىمىز جىلىپ، قۋانىپ قالدىق. گەنانى قۇرمەتتەيتىن، جاقسى كورەتىن، ونىڭ تالانتىنا سۇيسىنەتىن شەتەلدىك جانكۇيەرلەردىڭ سانى مولشىلىق. ونىڭ سىرتىندا قوس بوكسشىدان سۇحبات الامىن، سۋرەتكە تۇسىرەمىن دەگەن الەمنىڭ بارلىق بۇقارالىق اقپارات قۇرالدارىنىڭ وكىلدەرىن قوسىڭىز. اساي-مۇسەيىن سۇيرەتىپ، ەنتەلەپ، العا قاراي ۇمتىلىپ، مەن ءبىرىنشى كورەمىن، ەلدەن بۇرىن ساۋالدى مەن جولدايمىن، كەرەكتى جاۋابىمدى تەز الىپ، ەلىمە ەلدەن بۇرىن حابار تاراتامىن دەگەن ارىپتەستەرىمنىڭ قىزۋ تىرلىگىن كوردىم. ولاردىڭ اراسىندا مەن جانە ەلدەن بارعان ساناۋلى ارىپتەستەرىمدى كوزىم شالىپ قالدى. سونىمەن دۇبىرلەگەن جۇرتتىڭ دەلەبەسىن قوزدىراتىن، كوپتەن كۇتكەن مەرەكەنىڭ شىمىلدىعى ءتۇرىلدى. ەڭ العاشقى بولىپ ساحناعا ەكى مىقتىنىڭ شايقاسىنىڭ الدىندا ونەر كورسەتەتىن جاس بوكسشىلار (اندەكارد) شىقتى. توپتىڭ باسىن بۇگىندە اتىن ايگىلەپ ۇلگەرگەن، گەنناديدىڭ جانكۇيەرى، الەمدىك رەيتينگتە وزىندىك ورنى بار جەڭىل سالماقتاعى رومان گونسالەس (شوكاليتا) پەن مويزەس فۋەنتەس  كەلدى. ودان كەيىن كەزىندە گەنناديدەن وڭباي تاياق جەپ، جەتىنشى راۋندتا تىزە بۇككەن داۆيد لەمە  مەن ءتۇپتىڭ – تۇبىندە گەناعا قارسىلاس بولاتىن بوكسشى دەپ القالاپ جۇرگەن گەري و سالليۆان شىقتى. ارتىنشا ەلدى شۋلاتىپ برەندەن كۋك پەن مەكسيكالىق تاعى ءبىر بوكسشى حايمە مۋنگيا ورتاعا كەلدى. بۇلاردىڭ بارلىعىن ەل قوشەمەتپەن قارسى الىپ، قۇرمەت كورسەتتى. جاس بولسا دا تالاي باسەكەدە شىڭدالىپ، كاسىپقوي بوكستىڭ قىر-سىرىن ابدەن مەڭگەرگەن بوكسشىلار ورتادا ءجۇرىپ، وزدەرىن ناعىز چەمپيونعا بالاپ، ءبىر-بىرىنە كوزبەن سەس كورسەتىپ، مەرەكەنىڭ كورىگىن قىزدىردى. وسىدان كەيىن كەشەننىڭ ءىشى جاڭعىرىپ كەتتى. بۇعان دەيىنگى ايعاي انانىڭ قاسىندا جايشىلىق بولىپ قالعانداي. بۇل كەزدە كەشەنگە گەننادي گولوۆكين كىردى دەپ حابارلادى. وسىنى ەستىگەن جانكۇيەرلەر  «مGM گراند» ويىن-ساۋىق كەشەنىنىڭ ءىشىن جاڭعىرتىپ جىبەردى. تولقىنى جاعاعا شارپىعان تەڭىزدەي ەنتەلەپ، گولوۆكيندى مەن ءبىرىنشى كورەمىن دەگەندەي سارايدىڭ ءىشىن تولقىتىپ جىبەردى. سول ۋاقىتتا ورتانى قاق جارىپ، باپكەرلەرىمەن، ءوزىنىڭ ۇجىمىندا بىرگە ىستەيتىن ماماندارىمەن بىرلەسىپ گەنا دا كەلىپ جەتتى. ۇنەمى جايدارى مىنەزىمەن، اقجارقىن كوڭىلىمەن كوپشىلىكتى باۋراپ الاتىن قازاقستاندىق بوكسشى سول باياعى قالپىنان تايقىماي، جانكۇيەرلەرىنە قۇرمەت كورسەتىپ ساحناعا شىقتى. كوڭىل كۇيى دە، بابى دا جاقسى سەكىلدى. سىڭارى ماكسيم دە قولقانات بولىپ، باۋىرىنىڭ بار جاعدايىن تۋعىزىپ ءجۇر. وسىنى كورگەن مەن دە ءىشىپ جىلىپ، گەنناديدىڭ كەلبەتىنە ءسۇيسىنىپ، تالانتىنا باس ۇرىپ، قۋانىپ قالدىم. اۆەل سانچەس تە وزدەرىنە سەنىمدى. گەنانى جانكۇيەرلەر دە، ءباسپاسوز وكىلدەرى دە كوپ ۇستادى. قويعان ساۋالدارىنا ساۋاتتى جاۋاپ بەرىپ، ناعىز ەر مايتالمان بوكسشى ەكەنىن كورسەتتى. قالىڭ مەكسيكالىق جانكۇيەرلەردىڭ اراسىندا ءبىز دە بوي كورسەتىپ، گەناعا قولداۋ بىلدىردىك. قازاقستاننان بارعان ءۇش جۋرناليست بار ەكەنىمىزدى، قازاقستاننان كەلگەنىمىزدى ءبىلدىرىپ، گەنا، ءبىز كەلدىك، سەنىڭ قاسىڭدامىز، قازاقستاننىڭ ىستىق سالەمى مەن قولداۋىن الا كەلدىك دەپ ايقايلادىق. مۇنى ەستىپ، كورگەن گەننادي دە قۋانىپ ارقالانىپ قالدى. ارينە، جاۋاپ قايتارماسا دا، بىزگە قاراپ، كوردىم، راحمەت، سەنىمدەرىڭىزدى اقتايمىن دەگەندەي سىڭاي تانىتتى. قويىلعان ساۋال كوپ، بارلىعىنا دا جاۋاپ بەرىپ ۇلگەرىپ جاتىر. اسىرەسە، بوكسقا دايىندىعى جايلى، الۆارەسقا قانداي توسىنسىي دايىنداپ وتىرسىڭ دەگەن سۇراققا ناقتى جاۋاپ قايتتى.

– مەن شايقاسقا تولىق دايىنمىن. ءوزىمدى جاقسى سەزىنىپ، بابىمدامىن. سول كۇنى مەكسيكانىڭ تاۋەلسىزدىك مەرەكەسى. بۇل ۇلكەن قاسيەتتى مەرەكە. مەرەكەگە ورايلاستىرىپ ۇيىمداستىرعان بوكس كەشىندە مەن شارشى الاڭدا ناعىز شوۋ كورسەتەمىن. مەكسيكانىڭ مەرەكەسى ماعان كەدەرگى بولا المايدى، كەرسىنشە كۇشىمە قۋات قوساتىن بولادى. مەن پروفەسسيونالمىن، مەكسيكانىڭ تاۋەلسىزدىك مەرەكەسىنە ءوزىمنىڭ اتاقتارىمدى قورعاپ قالامىن، بۇل قارىمتا بولادى. بىراق، باسقا تاريح، ول تاريح جاقسى جاعىنان كورسەتكىش بەرەدى جانە جاقسى ناتيجەگە جەتەمىن، – دەدى.

ودان ءارى الۆارەسقا قاتىستى ساۋالىنا دا نىق سەنىممەن جاۋاپ بەردى. «مەن ءوزىم ارمانداعان قارسىلاسىما كەلدىم، ونىمەن جاقسى كەزدەسۋ وتكىزەمىن جانە باقىتتى كەزەڭىمە جەتەمىن. ول ءۇشىن الۆارەس ماعان مۇمكىندىك بەرۋى كەرەك، ءوزى ايتقانداي جۇدىرىقتاسۋى كەرەك. ەگەر ءدال ايتقانىنداي جۇدىرىقتاساتىن بولسا مەن ونى نوكاۋتقا جىبەرەمىن. ۋاقىت كەلدى، مەن كۇشتىمىن»، دەپ جانكۇيەرلەرىن ءدۇر سىلكىندىردى.

وسىدان كەيىن گەننادي ءوزىنىڭ ادامدارىمەن كەرى اتتانىپ كەتتى. ولاردىڭ كەتىپ قالعانىنا ءبىز دە العاشىندا تۇسىنبەي قالدىق. مۇمكىن ۇيىمداستىرۋشىلار قانداي دا ءبىر شوۋ ۇيىمداستىرىپ قويعان بولار دەپ ىشتەي وي تۇيدىك.

سودان سوڭ ساۋل الۆارەس كەلەدى دەپ حابارلادى. باعاناعى ايعاي ودان دا ارتىپ، ءتىپتى شەگىنەن شىعىپ كەتتى. ءبىز تەڭىز تولقىعانداي دەدىك، بۇل جولى مۇحيت تولقىعانداي بولدى. وزدەرى دە وسىنداي داڭعازا مەن داراقىلىقتى جاقسى كورەتىن حالىق ەمەس پە. شۋلاعاندا شىڭىراۋ شەگىنە جەتتى. سونىمەن ساۋل دا ساحنادا كوپ بولدى. ءوزىنىڭ ءتۇرلى جاتتىعۋلارىن كورسەتىپ، سۋرەتكە ءتۇسىپ، جۋرناليستەردىڭ سۇراقتارىنا جاۋاپ قايتتى. ءوز قىزمەتتەرىن اتقارعاننان كەيىن الۆارەس تە جاقتاستارىمەن بىرگە كەتىپ قالدى. بۇعان ءبىز قاتتى تاڭعالدىق. بۇلارى قالاي؟ ولار ءبىر-بىرىنە قاراپ كوزدەرىمەن سەس كورسەتپەۋشى مە ەدى. ءبىرىن ءبىرى كورمەيتىن بولعان با دەپ ويلانىپ قالدىق. راسىمەن دە ەكى مىقتىنىڭ اراسى ۋشىعىپ كەتكەنى سونشا ءبىز شارشى الاڭداعى شايقاسقا دەيىن ءبىر-ءبىرىمىزدى كورمەيمىز، سول كۇنى، بوكس كەشىندە شارشى الاڭدا بىراق كەزدەسەمىز دەپ بەل بۋىپتى.

وسىدان كەيىن بوكستىڭ قىزىق بولاتىنى كورىنىپ تۇر. 15 قىركۇيەك كۇنى ەكى بوكسشى دا ايانىپ قالمايتىنى انىق، ءبىر-ءبىرىن قۇلاتىپ تىنباي ءىستىڭ اياقتالمايتىنىن سەزدىم. بۇل دا سىزدەردىڭ كوكەيلەرىڭىزگە تۇيە جۇرەتىن وقيعانىڭ ءبىرى. سوندىقتان سىزدەر سول كۇنى بوكس كەشىن جىبەرىپ الماڭىزدار، مەن ايتقان وقيعانىڭ ءۇشىنشى كەزەڭى ياعني، نۇكتەسى وسى كۇنى قويىلماق.

بۇگىنگى كەزدەسۋدەن ۇلكەن ءبىر سۇراقتىڭ جاۋابى بەلگىلى بولاتىن. وتكەن جىلعى شايقاستان كەيىن ءتۇرلى الىپ قاشپا اڭگىمەلەردەن كەيىن، مامانداردىڭ سان ءتۇرلى ويلارىنان كەيىن الاڭعا قاي بوكسشىنىڭ ءبىرىنشى كەلەتىنى جۇمباق بولعان ەدى. ەستەرىڭىزدە بولسا بىلتىر بوكسشىلاردىڭ جانكۇيەرلەرمەن جۇزدەسۋىنە ءساۋلدىڭ ءبىرىنشى شىققانىن بىلەسىزدەر. مۇنىڭ دا وزىندىك سىرى بار.  بىزدىڭ ەلىمىزدەگى كونتسەرت كەشىندەگىدەي ناعىز مىقتى، قۇرمەتى مەن اتاعى الىسقا كەتكەن ءانشى سول كۇنگى ءان كەشىنىڭ سوڭىندا شىعىپ، كەشتىڭ نۇكتەسىن قوياتىن. سول سەكىلدى مۇندا دا ءبىرىنشى شىققان بوكسشىنىڭ اتاعى مەن مىقتىلىعى انىقتالادى. ەندەشە وزدەرىڭىز بىلگەندەي ءبىرىنشى بولىپ ساحناعا ءبىزدىڭ گولوۆكين شىقتى. ياعني، ءدال قازىرگى ۋاقىتتا قازاقستاندىق بوكسشىنى بارلىعى مويىنداپ، چەمپيون ەكەنىنە كۇمان كەلتىرىپ وتىرعان جوق. شىن مانىندە قانجىعاسىندا ءۇش بەلبەۋى بار گەننادي گولوۆكين – چەمپيون. ولاي بولسا، بۇگىنگى كەشتە گولوۆكيندى ءبىرىنشى بولىپ جانكۇيەرلەر قارسى السا، 15 قىركۇيەك كۇنى ورتاداعى تورەشى ءبىرىنشى بولىپ، ءبىزدىڭ جىگىتتىڭ قولىن كوتەرسىن دەپ تىلەيىك!

نەسىپ جۇنىسباي ۇلى، بەلگىلى سپورت ءجۋرناليسى، لاس-ۆەگاستان ارنايى sportpress.kz سايتى ءۇشىن.