تەننيسشىلەرىمىز قارت قۇرلىقتىڭ تورىنەن توبە كورسەتتى

بۇعان دەيىن حابارلاعانىمىزداي، الەكساندر بۋبليك، الەكساندر شەۆچەنكو، بەيبىت جۇقاەۆ، ەلەنا رىباكينا مەن يۋليا پۋتينتسەۆا «ۇلكەن دۋلىعا» تۋرنيرىندە كوڭىل كونشىتەرلىك ونەر كورسەتىپ جاتىر. مىسالى، بەيبىت جۇقاەۆتىڭ ءوزى جاس بولسا دا باس بولا بىلەتىنىن دالەلدەپ، العاش رەت ۋيمبلدوننىڭ ىرىكتەۋ سىنىنان سۇرىنبەي ءوتىپ، «ۇلكەن دۋلىنىڭ» كىلەڭ مىقتىلار وينايتىن باستى دوداسىنا جولداما الدى. وسىنىڭ ءوزى جاس سپورتشى ءۇشىن ۇلكەن جەتىستىك دەۋگە بولادى. سول سياقتى جاستار اراسىندا ۋيمبلدوندا ءامىر ومارحانوۆ، زاڭعار نۇرلان ۇلى مەن دامير جالعاسباي ىرىكتەۋ ويىندارىنا قاتىسىپ، ءساتتى ونەر كورسەتۋدە. ءتىل كوزىمىز تاسقا دەيىك!

اننا دانيلينا ءتورتىنشى رەت تورگە شىقتى

اننا دانيليناعا كەلسەك، ول ءتىپتى ءتورتىنشى جارىس قاتارىنان فينالعا جولداما الدى.

ەلىمىزدىڭ جۇپتىق سىنداعى ءبىرىنشى، الەمنىڭ 9-راكەتكاسى ۇلىبريتانيانىڭ يستبۋرن قالاسىندا ءوتىپ جاتقان WTA 250 ءتۋرنيرىنىڭ فينالىنا شىقتى.

ول وسىعان دەيىن «رولان گارروس»، لوندون WTA 500 جانە نوتتينگەم 250 تۋرنيرلەرىنىڭ فينالىنا شىققان ەدى.

دانيلينا بۇل جولى چەحيالىق ماري بوۋزكوۆامەن بىرگە جارتىلاي فينالدا ۇلىبريتانيالىقتار حەرريەت دارت پەن مايا لۋمسدەنمەن وينادى.

ءبىرىنشى پارتيادا ۇلىبريتانيالىق دۋەت 6:2 ەسەبىمەن باسىم ءتۇستى. ەكىنشىسىندە دانيلينا — بوۋزكوۆا دۋەتى 7:5 ەسەبىمەن ەسە قايتاردى. سودان كەيىن سۋپەر تاي-برەيكتە جەڭىستى كادىمگى جالپاق تىلمەن ايتقاندا ج ۇلىپ الدى. ەسەپ — 11:9.

ءبىر جارىم ساعاتتان استام ۋاقىتقا سوزىلعان باسەكەدە ەكەۋى 1 ەيسپەن بىرگە 11 برەيك-پوينتتىڭ ۇشەۋىن پايدالاندى. ۇلىبريتانيالىق جۇپ 4 برەيكپەن (7 برەيك-پوينت) كوزگە ءتۇستى.

ەندى قازاقستان مەن چەحيا سپورتشىلارىنىڭ كەلەسى قارسىلاستارى كەيىن انىقتالادى.

جىبەك قۇلامباەۆا جەڭىس جالاۋىن جەلبىرەتۋگە جاقىندادى

جىبەك قۇلامباەۆا سەربياداعى ءتۋرنيردىڭ ½ فينالىنا شىقتى.

الەمنىڭ 306-راكەتكاسى جىبەك قۇلامباەۆا سەربيانىڭ كۋرسۋمليسكا بانيا قالاسىندا جالاۋى كوتەرىلگەن ITF W15 ءتۋرنيرىنىڭ جارتىلاي فينالىنا جولداما الدى.

ول جارىستىڭ 1-راكەتكاسى بولىپ تىركەلىپ، شيرەك فينالدا بوسنيالىق سۋانا تۋكاكوۆيچپەن بەتپە-بەت كەلدى.

جىبەك قۇلامباەۆا قارسىلاسىن 6:0، 6:3 ەسەبىمەن ويسىراتا جەڭدى.

ماتچ 1 ساعات 5 مينۋتقا سوزىلدى.

ەندى ول فينالعا شىعۋ ءۇشىن رەسەيلىك ميلانا جابرايلوۆامەن وينايدى. ول ءۇش ساعاتقا جۋىق ۋاقىتقا سوزىلعان تارتىستى ويىندا سلوۆاكيالىق ستەللا كوۆاچيكوۆانى 5:7، 6:4، 6:2 ەسەبىمەن جەڭدى.

داستان كەنجالين،

استانا