Tennısshilerimiz qart qurlyqtyń tórinen tóbe kórsetti

Buǵan deıin habarlaǵanymyzdaı, Aleksandr Býblık, Aleksandr Shevchenko, Beıbit Juqaev, Elena Rybakına men Iýlııa Pýtıneva «Úlken dýlyǵa» týrnırinde kóńil kónshiterlik óner kórsetip jatyr. Mysaly, Beıbit Juqaevtyń ózi jas bolsa da bas bola biletinin dáleldep, alǵash ret Ýımbldonnyń irikteý synynan súrinbeı ótip, «Úlken dýlynyń» kileń myqtylar oınaıtyn basty dodasyna joldama aldy. Osynyń ózi jas sportshy úshin úlken jetistik deýge bolady. Sol sııaqty jastar arasynda Ýımbldonda Ámir Omarhanov, Zańǵar Nurlanuly men Damır Jalǵasbaı irikteý oıyndaryna qatysyp, sátti óner kórsetýde. Til kózimiz tasqa deıik!

Anna Danılına tórtinshi ret tórge shyqty

Anna Danılınaǵa kelsek, ol tipti tórtinshi jarys qatarynan fınalǵa joldama aldy.

Elimizdiń juptyq syndaǵy birinshi, álemniń 9-raketkasy Ulybrıtanııanyń Istbýrn qalasynda ótip jatqan WTA 250 týrnıriniń fınalyna shyqty.

Ol osyǵan deıin «Rolan Garros», London WTA 500 jáne Nottıngem 250 týrnırleriniń fınalyna shyqqan edi.

Danılına bul joly chehııalyq Marı Boýzkovamen birge jartylaı fınalda ulybrıtanııalyqtar Herrıet Dart pen Maııa Lýmsdenmen oınady.

Birinshi partııada ulybrıtanııalyq dýet 6:2 esebimen basym tústi. Ekinshisinde Danılına — Boýzkova dýeti 7:5 esebimen ese qaıtardy. Sodan keıin sýper taı-breıkte jeńisti kádimgi jalpaq tilmen aıtqanda julyp aldy. Esep — 11:9.

Bir jarym saǵattan astam ýaqytqa sozylǵan básekede ekeýi 1 eıspen birge 11 breık-poınttyń úsheýin paıdalandy. Ulybrıtanııalyq jup 4 breıkpen (7 breık-poınt) kózge tústi.

Endi Qazaqstan men Chehııa sportshylarynyń kelesi qarsylastary keıin anyqtalady.

Jibek Qulambaeva jeńis jalaýyn jelbiretýge jaqyndady

Jibek Qulambaeva Serbııadaǵy týrnırdiń ½ fınalyna shyqty.

Álemniń 306-raketkasy Jibek Qulambaeva Serbııanyń Kýrsýmlııska Banıa qalasynda jalaýy kóterilgen ITF W15 týrnıriniń jartylaı fınalyna joldama aldy.

Ol jarystyń 1-raketkasy bolyp tirkelip, shırek fınalda bosnııalyq Sýana Týkakovıchpen betpe-bet keldi.

Jibek Qulambaeva qarsylasyn 6:0, 6:3 esebimen oısyrata jeńdi.

Match 1 saǵat 5 mınýtqa sozyldy.

Endi ol fınalǵa shyǵý úshin reseılik Mılana Jabraılovamen oınaıdy. Ol úsh saǵatqa jýyq ýaqytqa sozylǵan tartysty oıynda slovakııalyq Stella Kovachıkovany 5:7, 6:4, 6:2 esebimen jeńdi.

Dastan KENJALIN,

ASTANA