سايىپقىران: بۇگىنگە بۇيىرعانى ءۇش قولا مەدال

بۇگىن شىمكەنت قالاسىندا ءوتىپ جاتقان نىسانا كوزدەۋ مەن ستەند اتۋدان XVI ازيا چەمپيوناتىندا قازاقستان قورجىنىنا تاعى ءبىر مەدال ءتۇستى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

تراپ جاتتىعۋىندا ارالاس كوماندالىق سايىستا قازاقستان-1 كومانداسى ساپىندا الىشەر ايسالباەۆ پەن ايجان دوسماعامبەتوۆا ءۇندىستان-2 قۇراماسىنان باسىم ءتۇستى. ەسەپ – 38:34. تاعى ءبىر قولا جۇلدەگە قىتايدىڭ تايپەيى يە بولدى.

التىن مەدالدى قىتاي-2 مەن كۋۆەيت-1 كوماندالارى ساراپقا سالىپ جاتىر.

بۇل الىشەر ايسالباەۆتىڭ ازيا چەمپيوناتىندا جەڭىپ العان العاشقى جۇلدەسى، ال ايجان دوسماعامبەتوۆا ەكىنشى رەت مەدال الىپ وتىر.

قازاقستان قۇراماسى — ءورت ءسوندىرۋ-قۇتقارۋ سپورتىنان الەم چەمپيوناتىنىڭ جۇلدەگەرى!

رەسەيدىڭ سارانسك قالاسىندا ءجاسوسپىرىم ۇلدار اراسىنداعى XIV جانە ءجاسوسپىرىم قىزدار اراسىنداعى X الەم چەمپيوناتى اياقتالدى.

جارىستىڭ سوڭعى كۇنىندە ەڭ تارتىستى سىنداردىڭ ءبىرى – جاۋىنگەرلىك قانات جايۋ بولدى. بۇل كەزەڭدە سپورتشىلاردىڭ كۇش-قايراتى مەن توزىمدىلىگى سىنالدى.

چەمپيوناتتا قازاقستان قۇراماسى قولا جۇلدەگەر اتاندى.

ارمان مىسا دزيۋدودان الەمدىك دودانىڭ مەداليسى اتاندى

بولگاريانىڭ سوفيا قالاسىندا جاسوسپىرىمدەر اراسىندا دزيۋدودان الەم چەمپيوناتى باستالدى.

جارىستىڭ العاشقى كۇنىندە جاس دزيۋدوشى ارمان مىسا (-50 كگ) قولا مەدال جەڭىپ الدى.

دزيۋدو فەدەراتسياسىنىڭ مالىمەتىنە قاراعاندا، ول 50 كەلىگە دەيىنگى سالماق دارەجەسىندە بەلدەسىپ،  بەس كۇرەستىڭ تورتەۋىندە جەڭىسكە جەتتى.

ارمان مىسا ىرىكتەۋ كەزەڭىندە تايپەيلىك شين يۋن چيەندى، امەريكالىق سامۋەل ابدۋماليك پەن ازەربايجان وكىلى انار گۋليەۆتى جەڭدى. ال جارتىلاي فينالدا وزبەكستان ءدزيۋدويسى حۋشنۋد سۋلتانوۆتان جەڭىلدى.

ءۇشىنشى ورىن ءۇشىن ماجارستاننىڭ بالۋانى ميلان تسابونى جەڭىپ، الەم چەمپيوناتىنىڭ قولا جۇلدەگەرى اتاندى.

جاسوسپىرىمدەر اراسىنداعى دزيۋدودان الەم چەمپيوناتى 30 تامىزعا دەيىن جالعاسادى. جارىسقا الەمنىڭ 71 ەلىنەن 551 دزيۋدوشى قاتىسىپ جاتىر.