بەيسەن قۇرانبەككە قۇرمەت كورسەتىلدى

جاقسى ادام باعبان سەكىلدى. ءوزىنىڭ تال شىبىقتاي وتىرعىزعان جەمىس اعاشىن، اسقان سۇيىسپەنشىلىكپەن، ىنتامەن قاراپ باعادى. سوسىن باعىنان ءۇزىلىپ تۇسكەن ءاربىر جەمىسىن جەپ، راحاتتانىپ جاتقان ادامدارعا قاراپ تۇرىپ ۇلكەن ءلاززات الادى. بۇل ناعىز ادامگەرشىلكتىڭ بيىك كورىنىسى. ادام ومىرىندە ءوزىنىڭ جانى قالاپ، تاڭداپ العان ماماندىعى بار عۇمىرىنا ازىق بولارى حاق.

ءيا، ەگەر سول سۇيىكتى ماماندىعىنىنىڭ جەمىسىن كورە بىلسە ودان اسقان باقىت جوق شىعار. ءبىزدىڭ ارىپتەسىمىز بەلگىلى ءسوز ونەرىنىڭ زەرگەرى، بەلگىلى جۋرناليست، تانىمال تەلەجۇرگىزۋشى، مارقۇم بەيسەن قۇرانبەكتى جەمىسىن ەل-جۇرتقا تاراتىپ بەرگەن زيالى باعبانعا تەڭەر ەدىك. حاديستە: «ادامنىڭ شىنايى بايلىعى — ونىڭ بۇل دۇنيەدە جاساعان جاقسىلىقتارى»، — دەيدى. ەندەشە، بەيسەننىڭ قانداي ادام بولعانىن، ونىڭ ەل ءۇشىن جاساعان يگىلىكتى جۇمىستارىنان بىلەمىز. اسىرەسە «ايتۋعا وڭاي» توك شوۋىنداعى اسەرلى سوزدەرىمەن ءماندى ماعىنالى قوزعاعان قوعامداعى وزەكتى تاقىرىبىمەن حالىقتىڭ جۇرەگىنىڭ تورىنەن ۇلكەن ورىن العان بەيسەن قۇرانبەكتىڭ ەسىمى قازاق جۋرناليستيكاسىندا ويىپ تۇرىپ ورنىن الىپ قالدى دەۋگە بولادى.

بەيسەننىڭ ءاربىر جۇرگىزگەن تەلەحابارى ارقىلى قالىڭ جۇرت كوكەيىندەگى وزەكتى ورتەر ماسەلەرلەرىنە جاۋاپ تاۋىپ باتالارىن بەرىپ وتىردى. جوعارى جۇرگىزۋ شەبەرلىگى ارقىلى ايتارى كوپ، بايتاعى كەڭ، ءوز سالاسىنىڭ شەبەرى ەكەنىن كورەرمەن كورىپ ءسۇيسىندى. مارقۇم باقيلىق دۇنيەگە وتكەنشە، سالاۋاتتى ءومىر سالتىن بەرىك ۇستاپ، سپورت سالاسىنا دا قالام تارتىپ ءجۇرۋشى ەدى. ءيا، ونىڭ ءبارى كەشە عانا بولعانداي. ءوتتى دە كەتتى. «دۇنيە سوققان جەلدەي، اققان سۋداي، كورگەن تۇستەي وتە شىعادى ەكەن»، — دەپ بەيىمبەت مايلين اتامىز ايتقانداي، سۇم اجال ارداق تۇتقان، ەل قادىرلەگەن، اسىل ازاماتتى ورتامىزدان ج ۇلىپ الىپ كەتتى. «ءولدى دەۋگە بولا ما، ولمەيتۇعىن ارتىنا ءىز قالدىرعان»، -دەپ حاكىم اباي ايتقانداي، از عۇمىرىندا كورنەكتى ءىز قالدىرا بىلگەن بەيسەن قۇرانبەكتىڭ جارقىن بەينەسى جادىمىزدا ماڭگى ساقتالارى ءسوزسىز. اللانىڭ ىسىنە ەش شارا جوق. قازاق جۋرناليستكاسىندا جۇرگىزۋشىلىك سالاسىنا سارا جول سالعان بەيسەننىڭ مەكتەبى جاس ۇرپاققا ۇلكەن ونەگى.

بۇگىندە بەلگىلى جۋرناليست، اسىل ازامات بەيسەن قۇرانبەكتى ەسكە الۋ ءىس-شارالارى ءوزى تۋعان وڭىردە جالعاسىن ۇزبەي كەلەدى. اسىرەسە، شاعىن فۋتبولدان قالامگەرلەر اراسىندا جىل سايىن تالدىقورعان قالاسىندا ءداستۇرلى تۇردە ۇيىمداستىرىلاتىن بەيسەن قۇرانبەكتى ەسكە الۋعا ارنالعان رەسپۋبليكالىق تۋرنير بيىل دا قىزىق تاماشاسىمەن جوعارى دەڭگەيدە بولىپ ءوتتى.

جارىسقا ەلىمىزدىڭ ءار ايماعىنان سايدىڭ تاسىنداي ساراپتالعان 8 كوماندا كەلىپ، جەڭىس ءۇشىن تارتىسقا تولى ويىندارىن كورسەتتى.

ءتۋرنيردىڭ سالتاناتتى اشىلۋى وتكەننەن كەيىن، تارتىستى كەزدەسۋلەرلەر جالعاسىپ ويىننىڭ كورىگىن قىزدىرا ءتۇستى. كەزىندە سەيداحمەت بەردىقۇلوۆ اتىنداعى ءداستۇرلى رەسپۋبليكالىق جارىس ۇزبەي ۇيىمداستىرىلىپ ەلگە تانىمالى قالامگەرلەر الاڭدا تارتىستى ويىن سالىپ، حالىق كەلىپ قىزىقتاۋشى ەدى.

شەرحان مۇرتازا، دۋلات يسابەكوۆ، عازيزبەك ءتاشىمباي، رابات جانىبەك، سۇلتانعالي قاراتاەۆ سەكىلدى قالامى جۇيرىك، ەلگە ايگىلى اقسامايلى جازۋشىلار مەن قازاق سپورت جۋرناليستيكاسىنىڭ قارا نارلارى الاڭ سىرتىندا تاماشالاپ ايقايدى سالىپ وتىراتىن. ول دا ءبىر داۋرەن ەكەن عوي. سول اعا بۋىن اقساقالدارىمىز كەلمەستىڭ كەمەسىنە ءمىنىپ كەتكەلى بەرى، ايتۋلى جارىستىڭ دۋمانى تارقاپ، ءدۇبىرى دە الىستاپ كەتكەن سياقتى. سوندىقتاندا قالامگەرلەردىڭ باستارى قوسىلىپ، باعىن سىنايتىن ءدۇبىرلى جارىستار ساۋساقپەن ساناۋلى-اق قالعان شىعار. سولاردىڭ ءبىرى — بەيسەن قۇرانبەكتى ەسكە الۋ جارىسى. بۇل سىن ەلدەگى جۋرناليستەر قاۋىمى ءۇشىن ءمان-ماعىناسى زور ءتۋرنيردىڭ بىرىنە اينالىپ كەلەدى.

حوش، سونىمەن كۇن ۇزاق تارتىستى وتكەن كەزدەسۋلەردىڭ ناتيجەسى بويىنشا جەڭىسكە جەتكەن كوماندالاردىڭ ەسىمدەرى دە انىق بولدى. تۋرنيرگە رەسپۋبليكامىزدىڭ ءار وڭىرىنەن ساراپتالىنىپ ساقاداي ساي كەلگەن سەگىز كوماندانىڭ اراسىندا رەسپۋبليكالىق تۋرنيرلەردە بايگەنىڭ الدىن بەرمەي جۇرگەن تالدىقورعاننىڭ «حاراكەتى» مەن قىزىلوردانىڭ «اقمەشىت» كوماندالارى دا بار ەدى.

كوماندالار ەكى توپقا ءبولىنىپ جەڭىس ءۇشىن جان بەرىسكەن ويىندار باستالدى. سونىمەن «ا» توبىنان «اقمەشىت» پەن «حاراكەت» كوماندالارى شىقسا، «ب» توبىنان «Setanta sport» پەن «بەك سپورت» كوماندالارى ۇزدىك كورىندى.

كەسكىلەسكەن جارتىلاي فينالدىق ويىنداردا «Setanta sport» كومانداسى «حاراكەتكە» قارسى تۇرعان ەدى. نەگىزگى ۋاقىت تەڭ اياقتالىپ، پەنالتي سەرياسىندا «Setantaنىڭ» اسىعى الشىسىنان ءتۇسىپ فينالعا ءبىر-اق شىقتى. ال «بەك سپورت» كومانداسى «اقمەشىتپەن» وتكىزگەن ويىن بارىسىندا دا جەڭىمپازدى پەنالتيدە انىقتاۋعا تۋرا كەلدى. پەنالتيدە «بەك سپورت» ويىنشىلارىنىڭ تەپكەن دوبى ءمۇلت كەتپەي، جەڭىسكە جەتىپ فينالعا جولداما الدى. شەشۋشى ويىندا «Setanta sport» كومانداسى «بەك سپورتتتى» 4:3 ەسەبىمەن جەڭىپ، باس جۇلدەگە تىگىلگەن 1 ملن تەڭگەنى يەلەندى. ال ءۇشىنشى ورىن ءۇشىن كەزدەسۋدە «اقمەشىت» تالاي ءتۋرنيردىڭ الدىن بەرمەي جۇرگەن «حاراكەت» كومانداسىنان باسىپ ءتۇسىپ قولا جۇلدەگەر اتاندى.

وسىلايشا كۇمىس جۇلدەگەر «بەك سپورت» كومانداسى 700 مىڭ تەڭگەگە يە بولسا، قولا جۇلدەنى العان «اقمەشىت» كومانداسى 500 مىڭ تەڭگەنى مىسە تۇتتى. سونىمەن قاتار ءار نوميناتسيالار بويىنشا وزىق ويىن كورسەتكەندەر سالتاناتپەن ماراپتاتتالدى. ءتۋرنيردىڭ «ۇزدىك ويىنشىسى» اتاعىنا «اقمەشىت» كومانداسىنىڭ ۇزدىگى امانگەلدى سەيىتحان لايىق بولسا، «ۇزدىك شابۋىلشى» نوميناتسياسى بويىنشا «Setanta sport» كومانداسىنىڭ ويىنشىسى الەكساندر حوحلوۆ ماراپاتتالدى. ال «كورەمەندەر كوزايىمى» سىيلىعىنا وسكەنمەننەن كەلگەن كوماندانىڭ ويىنشىسى سەرىك ءادىلحان لايىق دەپ تانىلدى.

نەگىزى قاندايدا ءبىر كوماندا بولسىن وسىنداي الامان جارىستارعا جاۋاپتىلىقپەن قاراپ، تياناقتى دايىندالىپ كەلسە مىندەتتى ءتۇردى ءبىر ناتيجەگە قول جەتكىزەرى بەلگىلى. قۇرىلعانىنا ءبىر جىل تولماي جاتىپ، وسىنداي ءىرى جارىستا «مەن» دەگەن قامشى سالدىرمايتىن سارا كوماندالاردى ساپتان شىعارىپ تاستاپ جەڭىسكە جەتۋ، تاباندى تالماي جاساعان ەڭبەك پەن قايسارلىقتى، ۇجىمدىق ىنتىماق پەن شەبەرلىكتى تالاپ ەتەرى ءسوزسىز. كوماندا ويىنشىلارىنىڭ بويىنا وزىنە دەگەن سەنىمدى ارتتىرىپ، جەڭىسكە دەگەن شەبەرلىكتەرىن ۇزبەي جاساتىپ كەلگەن جاتتىعۋلار ارقىلى جەمىسىن كورە بىلگەن كوماندا كاپيتانى، «Setanta sport» سپورت كانالىنىڭ ەلگە تانىمال بەلگىلى كوممەنتاتورى ەرجان كوشكىنباەۆتىڭ توككەن ماڭداي تەرى بەكەر كەتپەگىنىن كورگەندەيمىز. سونىمەن قاتار كوماندا قۇرامىندا تاماشا ويىن ورنەگىمەن كوپتى ءتانتى ەتكەن «Kazsport» تەلەارناسىنىڭ قالامى ۇشقىر ءجۋرناليسى، تالانتتى كوممەنتاتور رۋسلان باقىتجاننىڭ ءاربىر وتكەن الاماندا اشىلا تۇسكەنىن كورگەندەي بولدىق. مارەگە قاراي تاياعاندا قانات ءبىتىپ شاباتىن تۇلپارداي رۋسلاننىڭ تارتىستى ويىنى قايران قالدىرا تۇسۋدە.

«ۇيىمداستىرىلىپ ىستەگەن ءار ءىستىڭ ءبىر ءسانى بار. ءار قيمىلدىڭ وزىنشە، ىرعاعى بار، ءانى بار»، — دەگەن ەكەن ساكەن سەيفۋللين. ايرانداي ۇيىتىپ جارىسقا اپارعان بۇل كومانداعا سىنمەن قاراپ، ەزۋ تارتقانداردا بولعان ەكەن. دەسە دە تارتىستى ويىندارىمەن كوپشىلىكتى ءتانتى ەتكەن «Setanta sport» كومانداسى باسىنان-اق باس جۇلدەگە ۇمىتكەر كوماندانىڭ ءبىرى ەكەنىن اتويلاپ كورسەتكەن ويىندارىمەن كوپشىلىكتى ءتانتى ەتكەن. بۇل كوماندا ءساۋىر ايىندا تۇڭعىش رەت بەلگىلى سپورت كوممەنتاتورى امانگەلدى سەيىتقانوۆتى ەسكە الۋعا ارنالعان جارىسقا قاتىسىپ، كورەرمەندەر كوزىنە العاش تۇسكەن كوماندا بولاتىن. ول تۋرنيردە جەڭىسكە جەتپەسە دە بولاشاعىنان زور ءۇمىت كۇتتىرەر كوماندانىڭ ءبىرى ءارى بىرەگەيى ەكەنىن بايقاتقان ەدى. ءبىر عاجابى كوماندا تولىقتاي كوممەنتاتورلاردان جاساقتالعان. جاز ايىندا «الماتى» تەلەارناسى باق اراسىندا ۇيىمداستىرعان ءدۇبىرلى جارىستا بۇل كوماندا العاش رەت ۇزدىك ۇشتىكتەن كورىنىپ، قولا جۇلدەگەر اتانعان ەدى. ەندى مىنە، بەيسەن قۇرانبەكتى ەسكە الۋعا ارنالعان باق وكىلدەرى اراسىنداعى رەسپۋبليكالىق الامان ءتۋرنيدىڭ التىن جۇلدەسى مەن باس بايگەنى جەڭىپ الىپ، جەتىسۋ جەرىنەن جەڭىسپەن ورالىپ وتىر.

«باقىت پەن جەڭىس بارىن سالىپ ەڭبەكتەنگە بۇيىرادى»، — دەگەن ەكەن گەتە. ەندەشە، تاباندى ەڭبەكتەرىمەن جەڭىسكە جەتكەن ەرجان كوشكىنباەۆ جەتەكشىلىك ەتەتىن «Setanta sport» كومانداسىن جەڭىسىمەن قۇتتىقتايمىز! قانجىعالارى مايلانىپ، جەڭىسپەن جەلپىنگەن بۇل كوماندا الداعى جارىستاردا وسىنداي بيىك تۇعىردان كورىنۋ ءۇشىن جاتتىعۋلارىن شىڭداي ءتۇسۋدى ماقسات ەتىپ وتىر.

 

اقىن ورداباي ۇلى،

فوتو: جەڭىس ىسقاباي

تالدىقورعان